Ֆրանսիայի հիվանդանոցներից մեկում պարզել են, որ դեռ դեկտեմբերին կորոնավիրուսով հիվանդ մարդու են բուժել․ The Guardian
Ֆրանսիայի հիվանդանոցներից մեկում մասնագետներն արդեն ապաքինված թոքաբորբով հիվանդների հին նմուշները կրկնակի թեստավորման են ենթարկել և հայտնաբերել են, որ դեռ դեկտեմբերի 27-ին կորոնավիրուս ունեցող մարդու են բուժել․ դրանից միայն մեկ ամիս անց է ֆրանսիական կառավարությունը հայտնել երկրում կորոնավիրուսի առաջին դեպքերի մասին, գրում է The Guardian պարբերականը։
Փարիզի հյուսիսային արվարձաններում գտնվող Avicenne և Jean Verdier հիվանդանոցների վերակենդանացման բաժանմունքի ղեկավար, բժիշկ Իվ Քոհենի խոսքով՝ գիտնականները դեկտեմբերին և հունվարին բուժում ստացած 24 հիվանդի նմուշները վերաթեստավորել են, որոնցից մեկի մոտ կորոնավիրուսի առկայությունը հաստատվել է։
Աղբյուրը մանրամասնում է, որ նմուշները նախապես հավաքվել են PCR թեստերի միջոցով գրիպի հայտնաբերման համար, սակայն այստեղ օգտագործվում է նույն գենետիկ սկրինինգային գործընթացը, ուստի այն կարող է օգտագործվել նաև կորոնավիրուսի հայտնաբերման համար: Սխալներից խուսափելու համար յուրաքանչյուր նմուշը փորձարկվել է մի քանի անգամ։
Ֆրանսիայում մարտի 1-ից հետո կորոնավիրուսից ավելի քան 25 000 մարդ է մահացել։ Առաջին դեպքերը երկրում հաստատվել են հունվարի 24-ին։
Բժշկի խոսքով՝ առաջին վարակակրին իմանալուց հետո հնարավոր կլինի հասկանալ, թե ինչպես է վիրուսը տարածվել, սակայն դեռևս շատ վաղ է հասկանալու համար, թե նա Ֆրանսիայում կորոնավիրուսի «զրոյական հիվանդն» է եղել, թե ոչ։
Կայքի փոխանցմամբ՝ տղամարդը հիվանդ է եղել մոտ 15 օր և հասցրել է վարակել երկու երեխաներին, սակայն ոչ սուպերմարկետոմ աշխատող կնոջը։