Իշխանության կողմից այդպիսի գործարքների առաջարկները քաոսի են տանում երկիրը, դա դատապարտելի է. Լ. Ալավերդյանը՝ Ն. Փաշինյանի կողմից Միքայել Մինասյանին արված առաջարկի մասին
Ես դատապարտում եմ ցանկացած հայտարարություն կամ գործողություն, որոնք ուղղակի բերում են երկրի ներսում քաոս և խառնակչություն, սա հերթական այդպիսի գործողություններից մեկն է: Այս մասին Tert.am-ի հետ զրույցում ասաց Մարդու իրավունքների առաջին պաշտպան, Աժ նախկին պատգամավոր Լարիսա Ալավերդյանը՝ անդրադառնալով Սուրբ Աթոռում ՀՀ նախկին դեսպան Միքայել Մինասյանի հայտարարությանը, ըստ որի 2019-ին ՀՀ վարչապետ Նիկոլ Փաշինյանը ԱԱԾ նախկին տնօրեն Արթուր Վանեցյանի միջոցով առաջարկել է գործարքի գնալ և սիմվոլիկ դրամի փոխարեն Հայաստանից դուրս երջանիկ ապրել, սակայն նա մերժել է առաջարկը:
«Եթե տեղի է ունեցել այդպիսի գործողություն, ուրեմն դա խառնակչության պատճառով է և արձագանքը, փաստորեն, չի օգնում նրան, որ խառնակչությանը վերջ տրվի, հակառակը, կարծես թե այդ խառնակչությունն ավելի աշխուժանում է»,- ասաց նա:
Հարցին՝ խառնակչությունն ո՞ւմ կողմից է հրահրվում, նա պատասխանեց՝ գործողությունն անողի: «Եթե այդպիսի դատապարտելի բան է առաջարկվել իշխանության կողմից, դա խառնակչություն է: Հիմա դրանից հետո մեր բոլոր քննարկումները չեն բերում նրան, որ վերջ տանք այդ խառնակչությանը: Ես կողջունեմ ցանկացած քայլ, որն այդպիսի արհեստածին, ենթադրաբար քաղաքական համատեքստ ունեցող գործողություններին վերջ դնի, եթե այդպիսի գործողություններ կան: Ես չունեմ տվյալներ, որ դա տեղի է ունեցել, զուտ հայտարարությունից պետք է օգտվեմ»,- ասաց նա:
Դիտարկմանը՝ իշխանությունները չեն հերքել, որ նման բան տեղի է ունեցել, ԱԱԾ նախկին տնօրենն էլ էր հայտարարել, որ հանդիպել է Միքայել Մինասյանի հետ և հարցին՝ չհերքելը չի՞ փաստում,որ դա իրականություն է, նա նշեց, որ պետք է կրկնվի, բայց չհերքելը փաստում է նրա մասին, որ ցանկացած այդպիսի գործողություն խառնակչություն է, ուրիշ բան դրան անվանել չի կարելի: «Ես արդեն, որպես շարքային քաղաքացի, պահանջում եմ իշխանություններից ինչ-որ ձևով դադարեցնել այս ամենը: Իշխանությունները, եթե նման քայլեր են անում, պարզապես պետք է դադարեցնեն դրանք և ներողություն խնդրեն արածի համար, որ այլևս դա չշարունակվի: Հիմա մենք ի՞նչ ենք ուզում, որ մեր երկիրը դարձնենք ասեկոսեների, մեկնաբանությունների կամ սխալ գործողությունների երկի՞ր»,- ընդգծեց Լարիսա Ալավերդյանը:
Դիտարկմանը՝ Ucom ընկերության սեփականատերերից Գուրգեն Խաչատրյանի հայտարարությանը, որ իրեն ստիպել են օտարել ընկերության բաժնետոմսերը, հետևեց դատարանի կողմից որոշում՝ կալանավորել նրան, Ալավերդյանն ասաց, որ այս դեպքի մասին էլ նույնը պետք է ասի, դա ևս խառնակչություն է:
«Ես գտնում եմ, որ շատ թույլ իրավական հիմքերով, հիմնականում հայտարարությունների հիման վրա սկսում են իրավական գործընթաց: Ես դատապարտում եմ այդպիսի գործողությունը, դա որդեգրվել է որպես գործելաոճ՝ այս երկու տարիների ընթացքում: Մենք սկզբից լսում ենք սարսափելի լուրեր կամ սարսափելի որակավորումներ, հետագայում ինչ-որ գործընթաց է սկսվում կամ ոչ, սկսվելուց էլ չի վերջանում, կամ վերջանալուց էլ շատ տխուր վախճան է ունենում: Պետք է ուղղակի պահանջել իշխանություններից փոխել այս որդեգրած քաղաքականությունը, այդ ոճին վերջ դնել և արածների համար կրկնում եմ, որ պետք է ներողություն խնդրեն. Թե՛ այդ բառապաշարը, թե՛ այդ մտաշարը,՛ թե՛ այդ գործիքակազմը բոլորը դատապարտելի են»,- նշեց նա:
Իշխանությունների այս գործարքներն ու առաջարկները, ըստ Ալավերդյանի, քաոսի են տանում, երկիրը պառակտում են. «Դա ի դեպ մանիպուլատիվ տեխնոլոգիաների կարևոր նպատակներից մեկն է, անկախ նրանից թե ինչ պետք է տեղի ունենա երկրում, քաոսը դա առաջին իսկ արդյունքն է»,- շեշտեց նա:
Հարցին՝ այդ գործարքներն ընդդիմությանը լռեցնելու միջոց չե՞ն, նա ասաց. «Կոչ եմ անում ընդդիմությանը պայքարել և ոչ թե ենթարկվել այդպիսի գործիքակազմերի կիրառմանը: Ընդդիմությունը պետք է հանդես գա ավելի կազմակերպված, ավելի պահանջատեր և ավելի արդյունավետ մեթոդներով»: