Զբոսաշրջության ոլորտի շատ տնտեսվարողներ կանգնած են սնանկացման վտանգի առաջ, իսկ ներկայիս միջոցառումներով ոլորտը չենք կարող փրկել. Մեխակ Ապրեսյան
Բոլորի համար ակնհայտ է, որ առաջին կիսամյակը զբոսաշրջության իմաստով արդեն կորցրել ենք, քանի որ հունիս ամսվա այցելություններն ամբողջությամբ չեղարկված են, ներքին զբոսաշրջությունը կանգնած է, քանի որ տեղաշարժը սահմանափակված է: Այս մասին Tert.am-ի հետ զրույցում ասաց Տուրիզմի հայկական ֆեդերացիայի նախագահ Մեխակ Ապրեսյանը՝ ներկայացնելով նաև, թե որքան է տուժել երկիրը ոլորտի գործունեությունը կանգնեցնելուց հետո:
«Եթե համեմատենք անցած տարվա միայն ներգնա զբոսաշրջության ցուցանիշների հետ, կտեսնենք, որ 2019 թվականի առաջին կիսամյակի ընթացքում Հայաստան ներգնա զբոսաշրջային այցելությունների թիվը կազմում է 770 հազար, իսկ եթե հաշվի առնենք, որ ըստ ուսումնասիրության՝ մեկ զբոսաշրջիկը մեկ այցելության ընթացքում Հայաստանում ծախսում էր միջինը 700-800 դոլար, և դա բազմապատկենք զբոսաշրջիկների թվի հետ, ապա կստացվի, որ այդքան եկամուտ միայն ներգնա զբոսաշրջությունից է եղել: Եթե նույնիսկ հաշվի չառնենք, թե որքան աճ պետք է ունենայինք այս տարի, ապա առնվազն այդքան եկամուտ կորցրել ենք ներգնա զբոսաշրջության արդյունքում: Եթե կոպիտ հաշվարկ անենք, ապա կստացվի, որ դրա 20 տոկոսի չափով բյուջեի եկամուտներն են նվազել»,-ասաց նա:
Մեխակ Ապրեսյանը նշեց, որ ոլորտի տնտեսվարողները եկամուտից զրկված են և աջակցության կարիք ունեն: «Զբոոսաշրությունը չի մահացել, այն դեռ ապրելու է և իր հետ ապրեցնելու է, պարզապես կանգնած է, քնած է և անհրաժեշտ է փրկել զբոսաշրջության ոլորտը փլուզումից»,-ասաց նա և նշեց, որ Տուրիզմի հայկական ֆեդերացիան առաջարկություն է ներկայացրել կառավարությանը, քննարկումներ են ունեցել պատգամավորների հետ:
«Շատ տնտեսվարողներ կանգնած են, ըստ էության, սնանկացման իրական վտանգի առաջ».-ասաց նա և նշեց, որ կորոնավիրուսի տնտեսական հետևանքների չեզոքացման ծրագրերը թեև ողջունելի են, բայց կարևորեց զբոսաշրջության ոլորտին առանձնահատուկ ուշադրություն դարձնելը:
«Բոլորս գիտակցում ենք, որ առաջինը առավելապես բացասական հետևանքներ կրում է զբոսաշրջության ոլորտը, և հաշվի առնելով ոլորտի առանձնահատկությունը՝ պետք է առանձին միջոցառում լինի զբոսաշրջության ոլորտի համար»,-ասաց նա և նկատեց, որ առանձին միջոցառումների մեջ թեև ներառվում է զբոսաշրջության ոլորտի տարբեր ծառայություններ, սակայն եթե ուզում ենք էական աջակցություն ցուցաբերել զբոսաշրջութան ոլորտին, պետք է առանձահատուկ մոտեցում ցուցաբերենք:
Նա հայտնեց, որ իրենց առաջարկություններից երկուսն ընդունվել են, ինչը գնահատելի է, բայց բավարար չէ: Ըստ նրա՝ ներկայումս իրականացվող միջոցառումներով զբոսաշրջության ոլորտը չի կարող փրկվել:
«Զբոսաշրջության ոլորտի տնտեսվարողները զրկված են եկամուտներից, սակայն վարկային, հարկային պարտավորություններ ունեն, ունեն աշխատատեղերը պահպանելու հրամայական և մեծ ցանկություն ու ջանք չենք խնայում դրա համար, սակայն դա չի կարող երկար տևել, իրական վնասներ կուենանք դրա հետևանքով»,-ասաց նա և նկատեց, որ շատերը վարկեր ունեն վերցրած, և Տուրիզմի հայկական ֆեդերացիան առաջարկում է արտոնյալ վարկեր տրամադրել նրանց:
Մեխակ Ապրեսյանն ասաց, որ շատ օբյեկտներ, զբոսաշրջային օպերատորներ, տրանսպորտային ընկերություններ, հյուրանոցային տնտեսություններ, որոնք վարկային միջոցներ ներգրավելով ներդրումներ են կատարել, այսօր չեն կարողանում վարկային պարտավորությունները կատարել:
«Անհրաժեշտ է տրամադրել իրական վարկային արձակուրդներ, ոչ թե ներկայիս նման ասեն՝ երեք ամիս մի տվեք, հետո չորրորդ ամսում կգաք ամբողջ գումարը կտաք, քանի որ այդպես ավելի ծանր կացության մեջ են դնում տնտեսվարողներին: Իրական վարկային արձակուրդ ասելով՝ նկատի ունեմ, որ ողջամիտ ժամկետում ամբողջ վարկի մարման գրաֆիկը տեղափոխել»,-ասաց նա: