Քաղշինում քննարկվել է շենքերի միասնական տեղեկատվական համակարգերի ներդրման միջազգային փորձը
ՀՀ քաղաքաշինության կոմիտեում խորհրդակցություն է տեղի ունեցել: Այս մասին հայտնում են կոմիտեի մամուլի ծառայությունից:
Ինչպես լուծել երկար տարիներ մասնագետների կողմից բարձրաձայնվող շենքերի անձնագրավորման, միասնական համակարգչային տեղեկատվական համակարգի ներդրման խնդիրներն ու արդյունավետ դարձնել մեր երկրում առկա շուրջ 28 մլն քառակուսի մետր ընդհանուր մակերես ունեցող բազմաբնակարան բնակելի ֆոնդի կառավարումն ու պահպանումը, քննարկման ընթացքում կոմիտեի նախագահ Ավետիք Էլոյանին են ներկայացվել այս հարցերի ուղղությամբ 2018 թվականի նոյեմբերից ՄԱԶԾ կողմից ներգրավված կապալառուների իրականացված աշխատանքները:
Հարցն ամբողջությամբ պատկերացնելու համար, կոմիտեից հիշեցնում են, որ «Քաղաքաշինության մասին» ՀՀ օրենքով Քաղաքաշինության կոմիտեին է վերապահված շենքերի պահպանման, անվտանգ շահագործման, արդիականացման (այդ թվում՝ էներգախնայողության ու էներգաարդյունավետության բարձրացման) առաջարկությունների մշակումը, շենքերի անձնագրավորման կազմակերպումն ու համակարգումը, քաղաքաշինական կադաստրի վարումն ու կադաստրային ամփոփումը:
Կոմիտեն դիմել էր ՄԱԶԾ հայաստանյան գրասենյակին՝ «Էներգաարդյունավետ արդիականացմանն ուղղված ներդրումների ռիսկերի նվազեցում» ՄԱԶԾ ԿԿՀ (Կլիմայի կանաչ հիմնադրամ) ծրագրի շրջանակներում որոշ աշխատանքների իրականացմանն աջակցելու հնարավորության հարցը քննարկելու խնդրանքով:
ՄԱԶԾ հայաստանյան գրասենյակը հայտնել էր, որ առաջարկությունները համահունչ են ծրագրի նպատակներին և պատրաստակամություն հայտնել առաջնահերթ անդրադառնալ հասարակական, բազմաբնակարան շենքերի անձնագրերի օրինակելի ձևերի մշակման և շենքերի տեղեկատվական համակարգի ներդրման համակարգչային ծրագրի տեխնիկական առաջադրանք կազմելու, ինչպես նաև բազմաբնակարան շենքի պահպանման, հուսալիության բարելավման, էներգաարդյունավետության բարձրացման, շահագործման կանոնների մշակման աշխատանքներին:
Մրցույթների արդյունքում անձնագրերի մասով աշխատանքներն իրականացրել են «Ուրբան» հիմնադրամի և «Հայնախագիծ» ԲԲԸ կոնսորցիումի կողմից, շահագործման կանոնների մասով՝ Ճարտարապետության և շինարարության ազգային համալսարանը:
Քննարկման ընթացքում այդ կառույցների ներկայացուցիչները ներկայացրել են առ այսօր կատարված աշխատանքները, անձնագրավորման գործընթացի խոչընդոտները, վերլուծել շենքերի միասնական տեղեկատվական համակարգերի ներդրման միջազգային փորձը:
Քաղաքաշինության կոմիտեի նախագահ Ավետիք Էլոյանի, Կոմիտեի մյուս մասնագետների դիտարկումների և վերլուծությունների հիման վրա՝ առաջարկվել է լրամշակել ներկայացված փաստաթղթերը, քննարկել դրանք շահագրգիռ պետական մարմինների և մասնագիտական հանրության հետ: