«Ալաշկերտը» հայտարարել է բրազիլացի ֆուտբոլիստի տեղափոխության մասին
«Ալաշկերտը» երկրորդ ձեռքբերումն է կատարել ձմեռային տրանսֆերային պատուհանի ընթացքում:
Թիմի կազմը համալրել է բրազիլացի հարձակվող Գլաուսիո Ժոզե դե Արաուժո Սիլվան:
Հաջող բուժզննումից հետո բրազիլացի հարձակվողի հետ պայմանագիր է ստորագրվել, որը նախատեսված է մինչև 2020 թվականի օգոստոսը:
Այս մասին հայտնում է երևանյան ակումբի պաշտոնական կայքը:
Մինչև «Ալաշկերտ» տեղափոխվելը 24-ամյա ֆուտբոլիստը խաղացել է բրազիլական «Ամերիկա», «Գլոբո» և «Օեստե» թիմերում, իսկ վերջին ամիսներին նա հանդես էր գալիս բուլղարական «Դունավի» կազմում:
«Ալաշկերտի» հետ պայմանագիր ստորագրելուց հետո Գլաուսիոն կիսվել է իր տպավորություններով:
«Շատ ուրախ եմ, որ պայմանագիր ստորագրեցի «Ալաշկերտի» հետ: Միշտ էլ հաճելի է խաղալ չեմպիոնի կազմում: Պետք է պաշտպանենք չեմպիոնական տիտղոսը և կարողանանք հաջողության հասնել եվրագավաթներում:
Սա արտասահմանում հանդես գալու իմ երկրորդ փորձն է: Վերջին ամիսներին խաղում էի Բուլղարիայում: Կարծում եմ, որ այդ փորձը կօգնի ինձ արդեն «Ալաշկերտում»:
Թիմում ինձ շատ լավ ընդունեցին, ամեն ինչ հիանալի է: Ադապտացիայի հարցում ինձ շատ են օգնում իմ հայրենակիցներ Ջեֆերսոնը և Գուստավոն:
Ողջունում եմ նաև «Ալաշկերտի» երկրպագուներին: Ամեն ինչ կանեմ, որպեսզի ուրախացնեմ նրանց իմ գոլերով»,- նշել է Գլաուսիոն:
Գլաուսիոն «Ալաշկերտին» էր միացել մինչև Անթալիա մեկնելը և այս օրերին երևանյան թիմի կազմում մասնակցում է տարվա առաջին արտասահմանյան հավաքին:
Տեսանյութում ներկայացված են Գլաուսիոյի մասնակցությամբ լավագույն դրվագները.