Կադրերի խնդիր կա, բայց դա օբյեկտիվ իրողություն է, չենք կարող դա համարել ներկա իշխանությունների մեղքը. Գարիկ Քեռյան
Նոր կառավարության կազմը համապատասխանում է այն տրամաբանությանը, որը ստացվեց վերջին խորհրդարանական ընտրությունների արդյունքում: Այս մասին Tert.am-ի հետ զրույցում հայտնեց քաղաքագետ Գարիկ Քեռյանը:
«Եթե նախորդը՝ ազգային համաձայնության կառավարությունը, կազմվեց 2017 թվականի խորհրդարանական ընտրությունների հենքի վրա, հիմա «Իմ քայլը» բացարձակ մեծամասնություն է, և այստեղ կոալիցիայի կազմման անհրաժեշտություն չկար, և սպասելի էր, որ Կառավարությունը կկազմվի ՔՊ-ի գործիչների այն անդամներից, որոնք նախորդ 8-9 ամիսներին գործել են»,-ասաց նա:
Ըստ վերջինիս՝ այն նախարարություններում, որտեղ նախարար չի նշանակվել, դեռ պետք է քննարկվի այդ նախարարությունների ճակատագիրը: «Խոսել գործադիր իշխանության կազմի գործունեության արդյունավետության մասին դեռ վաղ է, քանի որ նոր պայմաններում է գործելու Ազգային ժողովը: Եթե նախորդ կառավարությունը գործում էր՝ չունենալով իր թիկունքում օրենսդիր մեծամասնություն, ապա ներկա Կառավարությունն արդեն գործելու է՝ լիակատար թիկունք և մեծամասնություն ունենալով, և այս պայմաններում ավելի է մեծանում արդյունավետ գործելու պատասխանատվությունը, որը խոսք է տրվել ընտրողներին»,-ասաց նա և կոչ արեց սպասել, մինչև երբ կլինեն նոր կառավարության կազմի հարյուր օրվա գործունեության ամփոփումները:
Դիտարկմանը, որ նույն նախարարներն են վերանշանակվել, որոնց աշխատանքն արդեն տեսել ենք և կարող ենք գնահատել՝ չսպասելով հարյուր օրվան, Գարիկ Քեռյանն արձագանքեց, որ արդյունավետության գնահատականը տրված է այն քաղաքական ուժին, որը մեծամասնություն է, և նա է գնահատում նախարարների լավն ու վատը, իսկ հանրությունը կամ մյուս ուժերը կարող են իրենց սեփական գնահատականը տալ:
Ինչ վերաբերում է հարցին, թե արդյոք իշխող ուժը կադրերի խնդիր ունի, քանի որ մեծ մասը վերանշանակվեց, որոշները գնացին ԱԺ, իսկ վերանշանակվածների մի մասն էլ նախորդ իշխանության կադրերից են եղել, Գարիկ Քեռյանը նշեց, որ եթե ուսումնասիրենք նախորդ կադրերի կենսագրությունը, գուցե նման հետևության գանք: «Ցանկացած նման կտրուկ շրջադարձերի ժամանակ կադրերի խնդիր առաջանում է, քանի որ եկող ուժը, որը նախկինում իշխանության չի եղել, չունի նման կադրային մեծ բալանս: Այսինքն՝ կադրերի խնդիր կա, բայց դա օբյեկտիվ իրողություն է, չենք կարող դա համարել ներկա իշխանությունների մեղքը, անխուսափելի է, որ նոր քաղաքական ուժը կադրերի խնդիր չունենա»,-ասաց նա: