Աշոտ Տեր-Մաթևոսյանը, Ռոզի Ավետիսովան, Դավիթ Աղաջանյանը և այլք՝ 25 մասանոց քրեական դրամայում
Հունվարի 7-ից Ucom ցանցում գործող «Արմենիա պրեմիում» հեռուստաալիքի եթերում կմեկնարկի «Սև հանքեր» 25 մասանոց քրեական դրաման: Դրամայի հիմքում Հայաստանի սահմանամերձ գյուղերից մեկում հայտնաբերված հանքի ու դրա շահագործման շուրջ ծավալվող զարգացումներն են:
Ֆիլմի ռեժիսոր և սցենարի հեղինակ Դավիթ Զոհրաբյանը նոր աշխատանքի առաջին մանրամասները վստահել է Tert.am Life-ին ու նաև լուսանկարներ տրամադրել նկարահանման հրապարակից:
Ֆիլմում գործողությունները ծավալվում են սահմանամերձ Գեղարդ գյուղում, որտեղ ըստ սյուժեի, երկրաբանների խումբը հայտնաբերում է ոսկու մեծ պաշարներ: Նրանք այդ լուրը հայտնում են իրենց վարձակալած մեծահարուստին։ Գյուղի մեծահարուստը, որին մարմնավորում է Շահեն Ոսկանյանը, սկսում է միջոցներ ձեռնարկել ոսկու հանքը շահագործելու համար, բայց հանդիպում է գյուղացիների դիմադրությանը:
«Այդ հանքը դեռ Խորհրդային միության ժամանակ է հայտնաբերված լինում, բայց այն օրինական ճանապարհով շահագործելու համար, գյուղի օլիգարխն ու գյուղապետը, որին մարմնավորում է Արմեն Մարությանը, գիտակցում են, թե որքան վնաս կհասցնեն գյուղին: Նրանք հասկանում են, որ գյուղացիներին փոխհատուցումը ավելի թանկ է արժենալու, քան ինքը՝ հանքը: Դրա համար նրանք դիմում են խաբեբայության ու վնասելու մեթոդներին: Նշանակված գյուղապետը չի ուզում խաղալ գյուղի ճակատագրի հետ, բայց ստիպված է, քանի որ այլընտրանք չունի»,-ասաց Դավիթը:
Ռեժիսորի խոսքով, խնդիրն ավելի է սրվում, երբ պարզ է դառնում, որ հանքը բացելու համար վնասվելու է նան գյուղի գերեզմանատան մի հատվածը։ Իրադարձությունները նոր ընթացք են ստանում, երբ գյուղ է վերադառնում ֆիլմի գլխավոր հերոսը՝ Արամը, որին մարմնավորում է Աշոտ Տեր-Մաթևոսյանը: Քառօրյա պատերազմից հերոսի կոչումով վերադարձած երիտասարդին դիմավորում է միայնակ պապը, որին մարմնավորում է Դավիթ Հակոբյանը և սիրած աղջիկը, որը գյուղապետի դուստրն է:
«Գլխավոր հերոսի՝ Արամի պապիկը գյուղի հերոսն է համարվում, որից շատ բան են սպասում գյուղացիները: Արամի քույրն էլ լրագրող է, որն աշխատում է Երևանում և սկսում է հանքի շահագործման վերաբերյալ լրագրողական հետաքննություն վարել: Նրան մարմնավորում է Ռոզի Ավետիսովան»,-ասաց ռեժիսորը:
Քրեական դրամայում հանդես են գալիս նաև Էվա Խաչատրյանն ու Դավիթ Աղաջանյանը, որոնք գյուղի մեծահարուստի զավակներն են, ինչպես նաև Սամվել Գրիգորյանը, Հասմիկ Վերդյանը, Ալինա Ավետիսյանը և այլք: Ռեժիսորը նկատեց, որ դերասանական այս թիմն առաջին անգամ է աշխատել միասին մեկ նախագծի շրջանակում:
«Ինձ թվում է շատ լավ է ստացվել վերջնական արդյունքը, որովհետև իսկապես լավագույն դերասանական կազմն էր ընտրված: Կային մարդիկ, որոնց հետ ինքս էլ առաջին անգամ էի աշխատում, բայց մեծ մասի հետ երկար տարիներ աշխատել ենք տարբեր նախագծերում,-ասաց նա և ավելացրեց, որ դերասանների ընտրության հարցում կոնկրետ սկզբունքներով չի առաջնորդվում,- Երբ սցենարը սկսում ենք կառուցել, մենք արդեն մոտավորապես պատկերացնում ենք, թե մեր դերասաններից ո՞վ ավելի լավ կկերտի այս կամ այն կերպարը»:
Դավիթը նշեց, որ քրեական դրամայի ժանրում նկարահանված ֆիլմում իրադարձությունները դինամիկ են զարգանում: Այնտեղ ներկայացվում են 15 օրվա ընթացքում ծավալվող գործողություններ, որոնք հանգուցալուծվում են ամիսներ անց, բայց այդ ամենը ամփոփված է 25 մասում: Ռեժիսորի համոզմամբ, հեռուստադիտողին սպասվում են դիտարժան րոպեներ ու պրոֆեսիոնալ դերասանական խաղ: