ՀՀԿ-ն ԱԺ-ն լուծարելու որոշմանը դիմադրելու ռեսուրս չունի, նրանց նպատակն իշխանությունների հետ երկխոսելն է. Արմեն Բաղդասարյան
«Հայաստանի Հանրապետական կուսակցություն» խմբակցության կոշտ դիմադրությունն՝ ԱԺ-ն լուծարելու և նոր արտահերթ ընտրություններ անցկացնելուն հասկանալի է, քանի որ ՀՀԿ-ն արտահերթ ընտրությունների դեպքում, հազիվ թե, հայտնվի խորհրդարանում կամ եթե անգամ հայտնվի՝ կունենա շատ ավելի փոքր խմբակցություն: Դրա համար չեն ցանկանում կորցնել այն, ինչ հիմա ունեն: Tert.am-ի հետ զրույցում նման տեսակետ հայտնեց քաղաքագետ Արմեն Բաղդասարյանը:
Հարցին, թե հեղափոխության ժամանակ էլ չէին ցանկանում իշխանությունը զիջել, բայց ստիպված էին և հիմա ի՞նչ ռեսուրս ունեն դիմակայելու, Արմեն Բաղդասարյանը պատասխանեց. «Կարծում եմ՝ ՀՀԿ-ն հիմա էլ ԱԺ-ն լուծարելու որոշմանը դիմադրելու ռեսուրս առանձնապես չունի: Կարծում եմ, որ նրանց նպատակն իշխանությունների հետ բանակցությունների մեջ մտնելը և երկխոսելն է, որի ընթացքում կարող են ինչ-ինչ պայմանավորվածություններ ձեռք բերել»:
Քաղաքագետը նկատեց, որ հիմա շատ կոշտ ասում են, որ դեմ են, բայց միաժամանակ դեմ չեն քննարկումներին: «Այսինքն՝ նրանք ցանկանում են որոշ խորհրդակցություններ անցկացնել իշխանությունների հետ: Այնուամենայնիվ, հույս ունենք, որ այդ խնդիրը կհաջողվի լուծել երկխոսությունների միջոցով և ոչ թե, ասենք, տասնյակ հազարավոր ցուցարարների ճնշումների միջոցով»,-ասաց նա:
Ըստ Բաղդասարյանի՝ հանրության ճնշումները ձևերից մեկն է, որ կարող է, օրինակ, վարչապետը հրաժարական տա և անմիջապես ասի, որ մի քանի տասնյակ հազար ցուցարարներ պարզապես կարող են շրջափակել ԱԺ շենքը և թույլ չտալ՝ երկու շաբաթ շարունակ ԱԺ նիստ հրավիրվի, և նոր վարչապետ ընտրեն: «Այդ դեպքում ԱԺ-ն կլուծարվի, դա ձևերից մեկն է, բայց ոչ ամենացանկալին, ամեն դեպքում երկխոսությունը, կոնսեսուսի միջոցով համաձայնության գալն ավելի ընդունելի է»,-ասաց նա:
Իսկ թե ինչ քննարկումներ կարող են լինել, ասաց, որ քաղաքական ուժերը պետք է, ի վերջո, համաձայնության գան այն խնդրի շուրջ, որ այս ԱԺ-ն չի արտահայտում քաղաքական ուժերի իրական հարաբերակցությունը, չի արտահայտում հասարակական տրամադրությունները: «ԱԺ-ի և հասարակական տրամադրությունների դիսբալանսը պետությանն է վնասում, եթե համաձայնության գան այդ հարցում, պետք է համաձայնության գան, որ պետք է լուծարվի, ընդ որում՝ ՀՀԿ-ն այդպիսով ինչ-որ իմաստով կվերականգնի կորցրած վարկը, որովհետև ընդհանրապես հետագայում ՀՀ-ում քաղաքական գործընթացի այսպես ասած՝ իրավունք կստանան, այսինքն՝ կուսակցական շահը մի կողմ է դնում և գերադասում է պետական շահը»,-ասաց նա:
Ինչ վերաբերում է մյուս քաղաքական ուժերին, Արմեն Բաղդասարյանը նշեց, որ ԲՀԿ-ն, հավանաբար, կհամաձայնի այդ տարբերակին: «Որովհետև ԲՀԿ-ն շարունակում է մնալ երկրորդ քաղաքական ուժը և լուրջ շանսեր ունի երկրորդ ուժը մնալ նաև արտահերթ խորհրդարանական ընտրությունների արդյունքում, այնպես որ, ԲՀԿ-ն գուցեև բանակցությունների արդյունքում կհամաձայնի: ՀՅԴ-ի մասով դժվարանում եմ ասել, որովհետև ՀՅԴ-ն էլ իր հերթին վստահաբար կկորցնի այն մանդատները, որ ունի ԱԺ-ում: Նրան էլ հաջորդ խորհրդարանականին հաղթահարելու լուրջ խնդիր ունեն»,-ասաց նա: