Казандагы БРИКС саммиты турында мәгълүмат чараларында 60 меңнән артык язма чыккан

Казандагы БРИКС саммитын уздыру вакытында бөтен дөнья буйлап массакүләм мәгълүмат чараларында халыкара дәрәҗәдәге вакыйга турында 60 меңнән артык язма чыккан. Бу хакта ТР Премьер-министры урынбасары, ТР Министрлар Кабинеты Аппараты җитәкчесе Шамил Гафаров Татарстан Хөкүмәт йортында БРИКС саммитын Казан шәһәрендә уздыру нәтиҗәләренә багышланган матбугат очрашуында әйтте.

«БРИКС саммиты башланганнан алып тәмам булганчыга кадәр массакүләм мәгълүмат чараларында 60 меңнән артык язма чыккан, аларны 8,2 млрд кеше караган. Җир шарының бөтен халкы дип әйтергә була. Татарстан һәм Казан турында мәгълүматны бөтен дөнья белде. Казандагы БРИКС саммитына дөньяның 94 иленнән якынча 1,5 мең журналист аккредитация алган иде», – диде Шамил Гафаров.

• БРИКСның 16нчы саммиты Казанда 22- 24 октябрьдә узды. БРИКС берләшмәсенә 2006 елда нигез салына. Анда Бразилия, Россия, Һиндстан, Кытай, Көньяк Африка, Гарәп Әмирлекләре, Иран, Мисыр һәм Эфиопия керә. 2024 елда БРИКСта рәислек итү хокукы Россиягә күчте.