Татарстанлылар «Метеор» Идел буе федераль округы яшьләр форумында өч беренче урын алды
4-9 июльдә Түбән Новгород өлкәсендә «Метеор» форумы үткәрелә. Яңа чарада Идел буе федераль округының 14 төбәге вәкилләре, шул исәптән Татарстаннан 74 делегат катнаша. Яшьләр командасы Татарстан Яшьләр министрлыгы ярдәме белән оештырылган. Бу хакта ведомствоның матбугат хезмәтендә сөйләделәр.
Форум яшьләрнең тормышта үз урынын табуга юнәлдерелгән һәм «Мәгариф» илкүләм проектының максатларына туры килә. Катнашучылар өчен креатив индустрияләр өлкәсеннән 7 юнәлеш буенча программа, төрле конкурслар, фестивальләр, күргәзмәләр һәм башка активлыклар оештырылган. Шулай ук биредә «Төбәк чатырлары конкурсы» үткәрелә. Татарстанлылар үз проектын әзерләгән, ул республиканың үзенчәлекле колоритын чагылдыра, кунакчыл һәм уңайлы урын буларак тәкъдим ителә.
«Без Татарстан чатырын форумнарда күргәндә, беркайчан да үтеп китмибез. Монда сине күптәнге дустың кебек каршы алалар һәм сыйламыйча яки үз тарихы белән уртаклашмыйча җибәрмиләр, бу очракта чатыр тарихы турында сүз бара. Шуңа күрә монда киләсе, еш кына кире кайтасы килеп тора», - дип сөйләде «Метеор» форумында катнашучылар.
Моннан тыш, Татарстан делегациясе форум кысаларында берничә бүләк яулады. Алар арасында диджеинг фестивалендә, «Киләчәк күнекмәләре» квизында һәм «Госстарт» программасының интерактив квизында өч беренче урын бар.
Татарстан Яшьләр министрлыгында билгеләп үтүләренчә, татарстанлылар «Метеор»да катнашу өчен 575 гариза биргән. Форумга кушылырга теләүчеләрнең күбесе Казан, Чаллы, Әлмәт, Яшел Үзән һәм Лениногорск районнарыннан иде.
- Илкүләм проектлар 2019 елдан Президент Владимир Путин карары белән гамәлгә ашырыла.