Песошин тормыш иминлеген тәэмин итү хезмәтләренең бәйрәмнәргә әзерлеген тикшерергә кушты
Яңа ел бәйрәмнәре вакытында тормыш иминлеген тәэмин итә торган барлык хезмәтләр югары әзерлек режимында булырга тиеш. Бу хакта Татарстан Премьер-министры Алексей Песошин Хөкүмәт Йортында узган киңәшмәдә әйтте. Татарстан Рәисе матбугат хезмәте шул турыда хәбәр итә.
«Муниципалитетларга мөрәҗәгать итәм: ял көннәрендә кизү тору графикларын да тикшерегез. Гражданнар оборонасы эшләре һәм гадәттән тыш хәлләр министрлыгыннан урыннарда сезнең линия буенча эш ничек оештырылуын каравын сорыйм. Бездә салют буенча чикләүләр, башка моментлар бар. Болар барысы да контрольдә булырга тиеш», - диде ул.
«Татар-информ» хәбәр иткәнчә, 25 декабрьдән 8 гыйнварга кадәр Татарстанда янгынга каршы махсус режим гамәлдә була, аның вакытында 2 меңнән артык хезмәткәр һәм 1 мең берәмлек техника җәлеп ителәчәк.