Казан парклары һәм скверларында Яңа ел программасы башланды
Алда торган Яңа ел бәйрәмнәрендә Казанда күпсанлы чаралар узачак. Быел Яңа ел парк программасы «Җемелдәү» дип атала, ул шәһәрнең 26 иҗтимагый киңлеген колачлаячак. Бу – казанлылар һәм туристлар өчен 161 вакыйга дигән сүз. Казанның Парклар һәм скверлар дирекциясе директоры Айгөл Латыйпова «Татар-информ» агентлыгында узган матбугат конференциясендә бәйрәм чаралары хакында сөйләде.
«1 гыйнварда барыбыз да яраткан вакыйга – «Крылья Советов» паркында «Голубой огонек» концерты була. Яңа елны 70, 80, 90нчы елларда ничек каршыласалар, бу концертта без дә аны шулай каршы алачакбыз. Бу юлы 90нчы еллар атмосферасына чумачакбыз. 4 гыйнварда барысын да «Казан» Гаилә үзәге янында көтеп калабыз, андагы кызыклы кичәдә һәркем үзен тау чаңгысы курортына эләккәндәй хис итәчәк. Биредә шулай ук күрәзәче эшләр дип көтелә, ул теләгән һәркемгә киләсе елда аны нәрсә көтәчәген бушлай әйтеп бирәчәк. Программа 14.00 сәгатьтә башлана», - диде Латыйпова.
6 гыйнварда Горький паркында зур гаилә чарасы – кышкы уен-көлке фестивале була. Латыйпова сүзләренчә, фестивальдә бик күп спорт төрләре тәкъдим ителәчәк, аларда ярышып, гаиләләр Казанның иң яхшы спорт гаиләсе исеме өчен көрәшә ала. Шул ук көнне Горки-Әмәт урманында татар стендапы кичәсе узачак.
«Бик кызыклы тагын бер чара – шәһәр мәдәният йортлары белән берлектә үткәрелә торган иртәнге Яңа ел бәйрәмнәре сериясе. 3 гыйнварда барлык паркларда балалар үз номерларын күрсәтәчәк һәм моның өчен бүләк алачак. 7 гыйнварда быел ачылган яңа киңлектә - Балыкчы бакчасында «Атмосфера» төркеме чыгыш ясый. », - диде Казанның Парклар һәм скверлар дирекциясе директоры.
Моннан тыш, оештыручылар аерым сайт (https://parkikazani.ru) ачкан, анда чараларның актуаль расписаниесе һәм андагы үзгәрешләр белән танышырга мөмкин.