Ютазы спортчысы гер спорты буенча дөнья чемпионатында көмеш медаль яулады
Ютазы авылында яшәүче Самат Солтанов гер спорты буенча дөнья чемпионатында көмеш медаль яулады. Бу хакта «Ютазы таңы» хәбәр итә.
«Россия командасын гына да 200 кеше тәкъдим итте. Казахстаннан йөзгә якын спортчы бар иде», — ди Самат.
Искәртик, көмеш приз яулаган Самат гер спортына биш яшендә килә. Аның тренеры Роберт Вафауллин тәрбияләнүчесенең сәләтле һәм бик җаваплы егет булуын ассызыклый. Аның авырлыгы 70 килограммнан кимрәк, ә һәр кулы белән ул 24 шәр килограммлы герне күтәрә. Афәрин, Самат! Спортчыбызның тырышлыгына — афәрин!
Ютазы спортчысын һәм аның тренерын әлеге югары нәтиҗә белән район башлыгы Аяз Шәфыйгуллин котлады. Район башлыгы аларга изге теләкләрен җиткерде һәм бүләкләр тапшырды.
Исегезгә төшерәбез, гер спорты буенча дөнья чемпионаты һәм беренчелеге сентябрьдә Үзбәкстан Республикасының Хива шәһәрендә узды. Ярышлар вакытында шәһәр чын зур интернациональ гаиләгә әверелде, анда 21 илнең иң көчле спортчылары җыйналды.