Миңнеханов Татарстанның хәрби операциягә ярдәм йөзеннән 2,5 млрд сум акча бирүен әйтте
Татарстан махсус хәрби операциягә ярдәм йөзеннән 2,5 миллиард сумга якын акча бүлеп биргән. Республика Президенты Рөстәм Миңнеханов бүгенге очрашуда Россия Президенты Владимир Путинга шул хакта хәбәр итте. Очрашу Мәскәүдә узды.
«Бу безнең барыбыз өчен дә бик мөһим тема. Әлеге юнәлештә актив эшлибез дип искәртәсем килә, махсус хәрби операциягә ярдәм йөзеннән 2,5 миллиард сумга якын акча бүлеп бирдек, шул исәптән үзебез шефлыкка алган Лисичанск шәһәренә дә. Кызганыч ки, без анда әлегә тулы куәткә эшли алмыйбыз», - диде Миңнеханов Путинга.
Татарстан Президенты шулай ук республиканың гуманитар ярдәм җибәрү буенча зур эш алып баруын искәртте – бүгенге көндә ике мең тоннага якын йөк озатылган инде. Аның шактый өлеше Татарстан шефлыкка алган Лисичанскига киткән. Әлеге зоналарда табиблар эшчәнлеге һәм халыкны азык-төлек белән тәэмин итү мәсьәләләре җайга салынган.
Миңнеханов Татарстанның «Алга» һәм «Тимер» батальоннары махсус хәрби операция зонасында хезмәт итүе хакында хәбәр итте.
ТР Президенты шулай ук хәрби хезмәткәрләрнең гаиләләренә ярдәм күрсәтү юнәлешендә дә эш алып барылуын искәртте.
«Бездә барлыгы алты герой бар, шуларның өчесе һәлак булды. Татарстанда туып үскән 52 кеше Батырлык ордены белән бүләкләнде. Аларга кадер-хөрмәт күрсәтәбез», - диде Миңнеханов.
«Бу хакта онытмагыз», - диде Путин. «Берсе дә онытылмады, барлык ихтыяҗлар канәгатьләндерелә. Кызганыч, һәлак булучылар да бар – без һәр очрак буенча әлеге бурычларга бик җитди карыйбыз», - дип сүзен төгәлләде Татарстан Президенты.