«НижгарСылу» бәйгесенә махсус хәрби операциягә бәйле бирем кертергә булганнар
Түбән Новгород өлкәсенең Кызыл Октябрь районы Уразавыл авылында 3 мартта «НижгарСылу» конкурсы узачак. Бәйгедә 16-18 яшьлек туташлар катнашыр дип көтелә. Илдәге вазгыятьне истә тотып, бәйгегә «Беz cеzнең белән» дигән биремне кертәргә булганнар.
Конкурсның төп оештыручысы булган өлкә татар автономиясе каршында эшләп килүче «Ак калфак» татар хатын-кызлар оешмасы җитәкчесе Зилә Әхмәдуллина шул турыда белдерде. «Туган як» газетасындагы әңгәмәгә сылтама белән Бөтендөнья татар конгрессы шул хакта яза.
«Бәйгенең «Беz cеzнең белән» дигән биремендә кызлар үз куллары эшләгән әйберләрен (бәйләгән оеклар, бияләйләр, шапка-шарфлар, чиккән кулъяулыклар һ.б.) тәкъдим итәчәк һәм ул әйберләр махсус хәрби операциядә катнашучы ир-егетләребезгә озатылыр», – дип белдерде Зилә Әхмәдуллина.
Бәйгедә яшь кызлар үзләре белән таныштырачак, аш-суга осталыгын күрсәтәчәк, милли киемнәрдә дефиле булачак.
«НижгарСылу» бәйгесен өлкә татарларының милли-мәдәни автономиясе һәм Нижгар татарлары конгрессы гамәлгә куя, төп оештыручысы – өлкә «Ак калфак» оешмасы. Бәйге татарлар компакт яшәгән Кызыл Октябрь, Сергач, Спас һәм Пильна округларының мәдәният һәм мәгариф бүлекләре ярдәмендә оештырыла. Округ администрациясе һәм мәдәният йорты коллективы, «Туган як» һәм «Сельские вести. Авылым хәбәрләре» газеталары да төрле яктан ярдәм күрсәтер дип көтелә.