Чаллы мэры мобилизацияләнгән ир-атның тормыш иптәшен улы тууы белән котлады

Чаллы мэры Наил Мәһдиев хәрби хезмәттә булган ир-атның берничә көн элек туган улы Савелийны әнисе белән бала тудыру йортыннан өйләренә чыгару чарасында булды. Бу хакта шәһәр башлыгы үзенең Телеграм-каналында сөйләде.

Баланы һәм аның әнисе Каринаны мэр белән бергә «КАМАЗ» ГАҖ генераль директоры урынбасары Жанна Хәлиуллина һәм депутатлар Олег Николаев, Евгений Архипов һәм Ринат Алимбеков каршы алды.

«Без батыр хәрбиләрнең гаиләләрен игътибарсыз калдырмыйбыз һәм аларны һәрвакыт хуплыйбыз. Сабыйның әнисе Каринага шәһәрдән 100 мең сум һәм республикабыздан бүләкләр тапшырдым», – дип язган Мәһдиев.

Карина иренең тиздән баланың туачагын сизүен әйтте. Аңа ире шалтыраткан һәм ул ярты сәгатьтән бала тапкан.

Мэр, хәрби хезмәткәрнең хатынына адреслап, сүз башлады. «Бүген зур вакыйга, хәзер сезнең улыгыз, ә әбинең дүртенче оныгы бар! Без сезнең белән бергә шатланабыз. Аллаһга шөкер, дөньяга балалар туа. Без барыбыз да сезгә улыгызны илебезнең лаеклы гражданины итеп үстерерүегезне телибез. Без һәрвакыт сезнең яныгызда, борчылмагыз! Сезнең тормыш иптәшегез Чаллы шәһәре кешесе һәм хезмәткәре, мөһим миссия башкара, илебезне саклый. Егетләребезне озатканда мин аңа һәм барлык ир-егетләргә дә, сезнең гаиләләрегезне ташламабыз, дидем! Сүзләребезне раслап, без бүген сезнең янда», – диде ул.

Гыйнвар башында Татарстан Президенты Рөстәм Миңнехановның мобилизациягә алынганнарны коммуналь туләүләр өчен салына торган штрафлардан азат итү турында карар имзалавын «Татар-информ» хәбәр иткән иде.