Мөфти Равил Гайнетдин мөселманнарның Яңа ел бәйрәменә мөнәсәбәте турында сөйләде
Дөньяви Яңа елны бәйрәм итүгә дини тыюлар юк, кешеләр «бәйрәмнәрдә бер-берсенә шатлык китерергә» тиеш. Бу хакта Россия мөселманнары Диния нәзарәте рәисе мөфти Равил Гайнетдин РИА Новости агентлыгына сөйләгән.
«Мөфти, дин әһеле, илебез гражданины буларак, без туганнарыбызга һәм якыннарыбызга шатлык китерергә тиеш дип әйтә алам. Шуңа күрә ватандашларны без яши торган Григориан календаре буенча Яңа ел белән котлыйм. Әгәр кешеләр бер-берсенә бүләкләр өләшә, бигрәк тә бүләкләрне балалар ала икән, ниндидер тыелган әйбер күрмим», - диде мөфти Гайнетдин.
Дин әһеле сүзләренчә, ислам тарафдарлары мөселман календаре буенча тормыш итә, ләкин алар Григориан календарен да исәпкә ала.
«Монда бернинди кыенлык та юк. Мөселманча Яңа ел җиткәч, без, дин таләп иткәнчә, Коръән укыйбыз, ә Григориан календаре буенча Яңа ел килгәч, бер-беребезгә бүләкләр тапшырабыз», - ди мөфти Гайнетдин.