Новости за 25.06.2024

БРИКС саммиты узу сәбәпле, Казан федераль университеты киләсе уку елы башын 1 сентябрьдән 1 ноябрьгә күчерде. Бу хакта КФУ ректоры Ленар Сафин ТР Министрлар Кабинетында узган брифингта хәбәр итте.

Казан федераль университетының Филология һәм мәдәниятара багланышлар институты кытай теле укытучыларын әзерли башлаячак. Бу хакта «Татар-информ»да матбугат очрашуында институт директоры Рәдиф Җамалетдинов хәбәр итте.

Сабантуйлар сезоны тәмамланганда Кариев театры театраль Сабантуй, ягъни милли бәйрәмнең дәвамы турында спектакль әзерли. 11 – 12 июльдә Кариев театрында «Тау битендә Сабантуй» премьерасы көтелә.

«Ярдам-Помощь» фонды каршындагы күз авырулары булган кешеләрне тернәкләндерү проектының РФ Президенты Владимир Путин грантын кулланып ясалган өлеше тәмамланган. Бу турыда Казанда узган матбугат вәкилләре белән очрашуда хәбәр иттеләр.

Татарстанда Бала хокуклары буенча вәкаләтле вәкил Ирина Волынец балалар өчен ял оештыру мәсьәләләре буенча кайнар линия үткәрәчәк. Ул иртәгә, 26 июньдә, 10.00 сәгатьтән 16.00 сәгатькә кадәр эшләячәк.

Татарстан Республикасы Премьер-министр урынбасары, Бөтендөнья татар конгрессының Милли Шура рәисе Васил Шәйхразыев эш сәфәре белән Омск өлкәсендә. Биредә ул II Халыкара Иртыш буе Сабан туе узачак мәйдан белән танышты. Бу хакта Бөтендөнья татар конгрессы матбугат хезмәте хәбәр итә.

Татарстан башкаласы хакимияте 2029 елга кадәр шәһәрдә мәдәниятне үстерү буенча программаны гамәлгә ашыруга 11 миллиард 682,3 миллион сумнан артык акча тотарга җыена. Документ проекты хәзерге вакытта коррупциягә каршы экспертиза уза.

Татарстанда җылылык өчен түләү тарифларын 60-70 процентка арттыру планлаштырылмый. Кайбер матбугат чаралары ТР Тарифлар буенча дәүләт комитеты рәисе урынбасары Сергей Павловның онлайн-эфир вакытында әйткән сүзләрен дөрес интерпретацияләмәде, дип белдерделәр ведомствоның матбугат хезмәтендә.

Татарстан югары уку йортларына 2024-2025 уку елына 22 меңнән артык бюджет урыны бүлеп бирелде. Соңгы өч елда мондый урыннарның саны 5 проценттан күбрәккә артты. Бу хакта ТР Мәгариф һәм фән министрлыгы башлыгы Илсур Һадиуллин ТР Министрлар Кабинетында узган брифингта хәбәр итте.

Югары Ослан районында булган юл һәлакәтендә өч кеше зыян күргән, дип хәбәр итте «Татар-информ»га вакыйганың шаһитлары.

Шапки бистәсенең Нестеров күле яр буенда беренче тапкыр өлкә бәйрәме статусында «Ленинград сабантуе – 2024» узган. Бу хакта Татарстанның Санкт-Петербург шәһәре һәм Ленинград өлкәсендәге Даими вәкиллеге хәбәр итә.

Татарстан Рәисе Рөстәм Миңнеханов «ВКонтакте» социаль челтәрендәге сәхифәсе һәм Telegram-каналында төбәк халкын ТАССР оешуга 104 ел тулу белән котлады.

Төркиянең көнбатышындагы Маниса шәһәрендә 4,8 магнитудалы җир тетрәү булган, дип хәбәр итә Х социаль челтәрендә табигать афәтләре нәтиҗәләрен бетерү идарәсе (AFAD). Бу хакта РИА Новости яза.

«Татаркино» 26 Россия һәм чит ил кинотасмаларын прокатлау һәм күрсәтү хокукларын сатып алырга планлаштыра. 1,15 млн сумлык тендер дәүләт сатып алулары порталында барлыкка килде.

Балтачта Гаилә елы уңаеннан җирлекләр арасында «Шушма моңнары» дип исемләнгән бәйге башланып китте.

Бүген Татарстанда аязучан болытлы һава көтелә, термометр баганасы +20 градустан югары күтәрелмәячәк. Бу хакта ТР Гидрометүзәгенең матбугат хезмәте хәбәр итә.

Түбән Кама районында «Төзүче» коммерцияле булмаган бакчачылык ширкәтендәге кешеләр күлдә ялгыз аккош баласын тапкан. Ялгыз кошчык берничә көн йөзгән, һәм аны даими рәвештә үрдәкләр эзәрлекләгән. Бу хакта Түбән Кама муниципаль районы рәсми сайтында хәбәр ителә.

Азнакай шәһәренең Зәңгәр мәчетендә 3 атна буе барган җәйге укулар тәмамланды. Җәйге лагерьда ислам дине нигезләре, пәйгамбәрләр тарихы, әдәп-әхлак, кул эшләре дәресләре, кызыклы очрашулар оештырылды. Укуларда 6-12 яшьлек 37 бала катнашты. Пешекчеләр егет-кызларны көнгә 3 тапкыр тәмле ризыклар белән сыйлады. Бу хакта «Азнакай» сайтында Гөлнара Хафизова хәбәр итә.

Бөек Ватан сугышында һәлак булган Габдулла Әшраповның җәсәден туган авылы Туймәткә алып кайтып кабат җирләделәр. Ул 83 елдан соң якыннары янына «кайтты». Аның сөякләрен, каскасын һәм башка шәхси әйберләрен, район хакимияте ярдәме белән оныклары Мәскәүдән барып алды. Бу хакта «Безнең Чирмешән» сайтында Кадрия Гамирова яза.

Балтачта терлек азыгын әзерләү буенча беренче нәтиҗәләр ясалды, җиңүчеләрне бүләкләделәр. Җиңүчеләргә район башлыгы Рамил Нотфуллин рәхмәт белдерде, акчалата бүләк тапшырды. Бу хакта «Хезмәт» сайтында хәбәр ителә.