ობამას ადმინისტრაციის გზავნილები - ექსპერტები კერის განცხადებების ქვეტექსტებზე საუბრობენ
ოფიციალური განცხადებების გარდა, ექსპერტები და პოლიტიკოსები იმ ქვეტექსტებზე აკეთებენ აქცენტს, რომელიც აშშ-ის სახელმწიფო მდივნის დიპლომატიურ ფრაზებში იკითხება.
მსოფლიოს ერთ-ერთი ყველაზე გავლენიანი დიპლომატის ყველა განცხადება პოლიტიკური დატვირთვასთან ერთად კონკრეტულ გზავნილს შეიცავს.
დიპლომატები ამბობენ, რომ ჯონ კერის ვიზიტის მსგავს შეხვედრებზე ყოველთვის მკაცრად არის განსაზღვრული დრო და საკითხების ნუსხა, რომელზეც დროის მცირე მონაკვეთში მხარეებმა უნდა იმსჯელონ. ამიტომ უმაღლესი დონის დახურულ შეხვედრებზე მხოლოდ განსაკუთრებულად მნიშვნელოვან თემებს განიხილავენ.
ის, რომ ამ თემების ჩამონათვალში რუსთავი2-ის ირგვლივ განვითარებული მოვლენები მოხვდა და ამის შესახებ შეერთებული შტატების სახელმწიფო მდივანი დეტალურად ინფორმირებული იყო, ამერიკელების შეშფოთების ხარისხზე და საკითხისადმი მაღალ ინტერესზე მიუთითებს.
ღია მინიშნება იმის შესახებ, რომ ლაკმუსის ტესტის მნიშვნელოვანი ნაწილი მედია-პლურალიზმია, ექსპერტებსა და პოლიტიკოსებში დამატებით კითხვის ნიშნებს აღარ ტოვებს. ჟურნალისტები და არასამთავრობო სექტორის წარმომადგენლები მიიჩნევენ, რომ ასეთი მკაფიო განცხადება სწორედ რუსთავი2-ის წინააღმდეგ დაწყებულმა შეტევამ განაპირობა.
ოპოზიციაში თვლიან, რომ ობამას ადმინისტრაციის ერთ-ერთი ყველაზე გავლენიანი პოლიტიკოსის განცხადებაზე ხელისუფლების რეაქცია არაადეკვატურია.
პოლიტიკოსები ფიქრობენ, რომ პარტნიორი ქვეყანა მინიშნებებს მართალია, დიპლომატიურ ენაზე, თუმცა სწორედ იმ თემებზე აკეთებს, რაც მათთვის პრობლემური საკითხების ნუსხაშია.
ავტორი: თამარ ბაღაშვილი