ხელისუფლების წარმომადგენლებთან კომუნიკაცია გართულდა - ჟურნალისტები პრემიერს მიმართავენ
ჟურნალისტებისა და მედიაორგანიზაციების ნაწილმა საქართველოს პრემიერმინისტრს გიორგი კვირიკაშვილს მიმართა. ისინი აცხადებენ, რომ ჟურნალისტებისათვის ხელისუფლებასთან კომუნიკაცია გართულდა.
მედიის წარმომადგენლები მიუთითებენ კანცელარიაში სხდომათა დარბაზთან მინისტრების ჩაწერის აკრძალვაზეც.
„მართალია, მათთვის ცალკე მოეწყო მედიაცენტრი, თუმცა, იქ მინისტრი მხოლოდ სურვილის შემთხვევაში ჩადის და არ არის ვალდებული სხდომის დასრულების შემდეგ მედიის კითხვებს უპასუხოს. სხდომათა დარბაზი ერთადერთი ადგილი იყო, სადაც ჟურნალისტებს საშუალება ჰქონდათ კრიტიკული და არასასურველი კითხვები დაესვათ მინისტრებისთვის“, - აღნიშნულია განცხადებაში.
ჟურნალისტური ეთიკის ქარტიას მიმართა გაზეთმა „პრაიმტაიმმა“, რომელიც აცხადებს, რომ თავდაცვის მინისტრი მათთან კომუნიკაციაზე უარს ამბობს. გაზეთმა ამ საკითხზე მასალაც გამოაქვეყნა (თინა ხიდაშელის სკანდალური “გარიგების” მცდელობა ,,პრაიმტაიმთან”), თუმცა მათი თქმით, პრობლემა დღემდე არ მოგვარებულა.
გართულებულ კომუნიკაციაზე საუბრობს საგამოძიებო სტუდია „მონიტორიც“. ჟურნალისტები აღნიშნავენ, რომ ხელისუფლების წარმომადგენლები ხშირ შემთხვევაში უარს ამბობენ მათთან კომენტარის გაკეთებაზე. გარდა ამისა, უწყების პრესსამსახური კითხვების გაგზავნას და შემდეგ წერილობით პასუხს სთავაზობს, ეს კი ფაქტობრივად უარის თქმას ნიშნავს, განსაკუთრებით მათთვის, ვინც სატელევიზიო პროდუქტს ქმნის, ვინაიდან ვიზუალური გამოსახულების გარეშე გადაცემა ვერ მომზადდება და მთავარი, წერილობითი პასუხი ჩაძიების და კრიტიკული კითხვის დასმის საშუალებას არ იძლევა.
„გვესმის, რომ ხელისუფლებაში მყოფი პირების გრაფიკი დატვირთულია, თუმცა, საზოგადოებასთან საუბარი ამავე გრაფიკის ნაწილი უნდა იყოს. ჟურნალისტები სწორედ მოქალაქეების ინფორმირებისთვის საჭირო კითხვებს სვამენ. ხელისუფლება საზოგადოების წინაშე ანგარიშვალდებულია, რაც წინასაარჩევნო პერიოდში ორმაგ მნიშვნელობას იძენს“, - აღნიშნავენ მედიის წარმომადგენლები.
ამავე დოკუმენტში ჩამოთვლილია მედიის საქმიანობაში ხელშეშლის ფაქტები, რომელთა შედეგიც საზოგადოებისთვის ამ დრომდე უცნობია.
დოკუმენტს ხელს აწერს საქართველოს ჟურნალისტური ეთიკის ქარტიის წევრი 274 ჟურნალისტი, საქართველოს საზოგადოებრივი მაუწყებელის საინფორმაციო სამსახური, სამაუწყებლო კომპანია რუსთავი 2, რეგიონულ მაუწყებელთა ასოციაცია (GARB), პრაიმტაიმი, ტელეკომპანია „პირველი“, ტელეწამყვანი ინგა გრიგოლია, ლიბერალი, საინფორმაციო ცენტრების ქსელი, საინფორმაციო სააგენტო აქცენტი, ჟურნალისტი მერაბ მეტრეველი, მედიასახლი გურია ნიუსი, საქართველოს მედია მონიტორინგის ცენტრი, კვლევითი ჟურნალისტიკის და ადვოკატირების ცენტრი და მისი ვებპლატფორმა “ევროპა საქართველოსთვის”, კავკასიის ჟურნალისტთა საერთაშორისო ცენტრი – CCFJ, On.Ge Media.Ge, Kutaisipost.Ge, მულტიმედია ცენტრი „ჩემი ხარაგაული“.