პოლიტიკოსების ნაწილი ღარიბაშვილის გადადგომას ბიძინა ივანიშვილს უკავშირებს
ირაკლი ღარიბაშვილის თანამდებობიდან გადადგომას ყოფილი პრემიერმინისტრის გადაწყვეტილებას უკავშირებს არასაპარლამენტო ოპოზიცია.
პოლიტიკური პარტიების ლიდერები მიიჩნევენ, რომ ღარიბაშვილი პოსტიდან არა საკუთარი სურვილით, არამედ ბიძინა ივანიშვილის გადაწყვეტილების გამო წავიდა.
პოლიტიკოსების თქმით, ამ ნაბიჯით ყოფილმა პრემიერმა წინასაარჩევნო კამპანია ოფიციალურა დაიწყო.
არსებობს მეორე ვერსიაც, ირაკლი ღარიბაშვილი იუსტიციის უმაღლესი საბჭოს მდივნის ლევან მურუსიძის სკანდალს შეეწირა.
არაფორმალური მმართველობის პრობლემებზე საუბრობდა დღეს არასაპარლამენტო ოპოზიციის მეორე ნაწილი.
მათი თქმით, ირაკლი ღარიბაშვილის თანამდებობიდან უმიზეზოდ წასვლით, პარტნიორებში ბიძინა ივანიშვილის მიერ ქვეყნის მართვაზე დამატებითი კითხვები გააჩინა და დემოკრატიას ზიანი კიდევ ერთხელ მიადგა.
ლეიბორისტული პარტიის ლიდერი კი ვადამდელი საპარლამენტო არჩევნების დანიშვნას ითხოვს.
ოპოზიციაში ფიქრობენ, რომ არაფორმარული მმართველობის პირობებში არც ერთი კანდიდატი ბიძინა ივანიშვილს გავლენისგან თავისუფალი ვერ იქნება და დამოუკიდებლად გადაწყვეტილებებს ვერ მიიღებს.
ავტორები: ნინო სამყურაშვილი, ნინო ჭოხონელიძე, გოგიტა მაღლაკელიძე.