ლევან მურუსიძეს სანდრო გირგვლიანის მამა დაუპირისპირდა
ლევან მურუსიძეს სანდრო გირგვლიანის მამა დაუპირისპირდა და სამართლიანობის აღდგენის პროცესი ეჭვქვეშ დააყენა.
მან პოლიტიკური განცხადება პრეზიდენტის სასახლეში გააკეთა, სადაც მისი მეუღლე, ირინა ენუქიძე, პრეზიდენტმა თამარ მეფის ორდენით გარდაცვალების შემდეგ დააჯილდოვა.
გურამ გირგვლიანმა პრეზიდენტს, მთავრობასა და არასამთავრობოებს მოუწოდა, რომ სანდრო გირგვლიანის საქმის მოსამართლის თანამდებობაზე ხელახლა დანიშვნა არ დაუშვან.
პრეზიდენტს გამოსვლაში მოსამართლეების შერჩევის პროცესი არ უხსენებია. გიორგი მარგველაშვილმა მხოლოდ ირინა ენუქიძის საქმიანობა შეაფასა.
გირგვლიანების ოჯახის დაჯილდოებასთან ერთად, პრეზიდენტის სასახლეში მთავარი თემა ლევანის მურუსიძის სამოსამართლეო საქმიანობა და გახმაურებულ საქმეებზე მის მიერ გამოტანილი გადაწყვეტილებების შეფასება იყო.
ოპოზიცია პრემიერ-მინისტრსა და მმართველი კოალიციას იუსტიციის უმაღლესი საბჭოს თავმჯდომარის ღია მხარდაჭერაში ადანაშაულებს.
ისინი დარწმუნებულები არიან, რომ ლევან მურუსიძის მოსამართლედ ხელახლა დანიშვნის შემთხვევაში, ხელისუფლება მას პოლიტიკური დაკვეთების შესრულებისთვის გამოიყენებს.
რა პოზიცია აქვს გირგვლიანის საქმის მოსამართლის მიმართ ხელისუფლებას, დღეს მმართველ კოალიციაში შეფასებებისგან თავი შეიკავეს.
ხელისუფლებას მოთხოვნები დღეს საქართველოს განვითარების ფონდის დამფუძნებელმა წაუყენა. პაატა ბურჭულაძემ საგანგებო განცხადება თანაგუნდელთან, დავით ჯანდიერთან, ერთად გააკეთა, რომელიც სტრასბურგში გირგვლიანის ოჯახის ინტერესებს იცავდა.
იუსტიციის უმაღლესი საბჭოს არცერთ წევრს, მათ შორის ბრალდებების მთავარ ადრესატ ლევან მურუსიძეს დღეს ოპონენტებისთვის პასუხი არ გაუცია.
იუსტიციის უმაღლეს საბჭოში მოსამართლეების არჩევასთან დაკავშირებით კენჭისყრა პარასკევს გაიმართება.
ავტორი: ნინო სამყურაშვილი