Новости за 16.08.2015

80 მშვიდობიანი მოქალაქე ემსხვერპლა სირიაში სამთავრობო ძალების ავიაშეტევას. ავიაციამ დამასკოს მახლობლად მდებარე ქალაქ დუმის ბაზრის ტერიტორია დაბომბა.

მოსამართლეთა დანიშვნის პროცესის დახურვას ინფორმაციისა და თავისუფლების განვითარების ინსტიტუტის ხელმძღვანელი აკრიტიკებს. გიორგი კლდიაშვილი მიიჩნევს, რომ იუსტიციის საბჭოს ახალი წესი სასამართლო სისტემაში უკან გადადგმული ნაბიჯია. კლდიაშვილი არ გამორიცხავს, რომ დახურულ კარს მიღმა იუსტიციის საბჭოში მოსამართლეებზე ზეწოლა მიმდინარეობდეს.

თბილისში ჩატარებული UEFA-ს სუპერთასის მატჩი საოკუპაციო რეჟიმის უკმაყოფილების მიზეზი გახდა. აფხაზეთის ადგილობრივი რეჟიმის მხარდამჭერებმა ბარსელონა-სევილიას თამაშზე აფხაზეთიდან დედაქალაქში ჩამოსული მოქალაქეები საზღვრის დარღვევასა და აფხაზი ხალხის შეურაცხყოფაში დაადანაშაულეს. საგანგებო განცხადება 1992-93 წლების ომის მონაწილეებმა გაავრცელეს. საზოგადოებრივმა მოძრაობა არუნამ ფეხბურთის საყურებლად გადმოსული ახალგაზრდების დასჯა მოითხოვეს.

ბოლო მონაცემებით გაერო-ს გენერალურ ასამბლეას საქართველოდან სავარაუდოდ ორი დელეგაცია დაესწრება. ერთი პრემიერმინისტრის ხელმძღვანელობით, მეორე კი პრეზიდენტის ხელმძღვანელობით.

ცხოველების სასაკლაო შუა მინდორში და განსაკუთრებული სისასტიკით მოკლული პირუტყვი.

ქსოვრისში გაჩენილი ხანძარი უკვე სოფელ ვაზიანს მოედო. ამ დორისთვის სახანძრო ბრიგადები ცდილობენ ვაზიანში ცეცხლის ლოკალიზებას, თუმცა აალება იმდენად დიდია, რომ სამუშაოები გართულებულია. როგორც სპეციალისტები აცხადებენ ხანძრის გავრცელების საფრთხე დასახლებულ პუნქტებზე არ არსებობს.

პაკისტანში პროვინცია პენ–ჯაბას შინაგან საქმეთა მინისტრი მოკლეს. თვითმკვლელმა ტერორისტმა მაღალჩინოსნის სახლთან თავი იმ დროს აიფეთქა, როდესაც ის შეხვედრას მართავდა.

დონეცკში პრორუსი სეპარატისტების ძალები სრულ საბრძოლო მზადყოფნაში მოიყვანეს. თვითგამოცხადებული სახალხო რესპუბლიკის მაღალჩინოსნების მტკიცებით, ისინი სამთავრობო ძალების მხრიდან უახლოეს მომავალში მასშტაბური შეტევის დაწყებას ელოდებიან.

ინდონეზიაში გაუჩინარებული სამგზავრო თვითმფრინავის კვალს მიაგნეს. ლაინერმა პაპუას მთიან რეგიონში განიცადა კატასტროფა.

პრეზიდენტის ადმინისტრაციის მიერ გაკეთებულ "ნაჩქარევ განცხადებას" უწოდებს უმრავლესობის ლიდერი გია ვოლსკი გაერო-ში გასამგზავრებელი დელეგაციების საკითხის გარშემო წარმოქმნილ ახალ გაუგებრობას. ვოლსკი პრეზიდენტის ადმინისტრაციისგან განმარტებებს ელოდება თუ რა ღონისძიებებზე დასასწრებად მიდის ის გაერო-ში.

სამაშველო სამსახურები უკვე 2 საათია სოფელ ქსოვრისთან ხანძრის ჩაქრობას ცდილობენ. ცეცხლის ლოკალიზების მცდელობა დუშეთის მხრიდანაც ხდება, რადგან ხანძრის გავრცელების საფრთხე არსებობს. 

მოსამართლეობის კანდიდატებთან გასაუბრება იუსტიციის საბჭოს დახურულ სხდომებზე ტარდება, რასაც კოალიცია დამოუკიდებელი და გამჭვირვალე მართლმსაჯულებისათვის წევრი ორგანიზაციები აპროტესტებენ.

უკრაინის სამთავრობო ძალების დახმარებას საკუთარი რესურსით ცდილობს ქალაქ ზაპოროჟიეში მდებარე მუზეუმი, სადაც კლასიკური მანქანების ყველაზე დიდი კოლექცია ინახება.

ხანძარი ქსოვრისში-ამ წუთებში ე.წ. ქსოვრისის გორაზე ცეცხლს 6 სახანძრო მანქანა აქრობს. ადგილზე მობილიზებულია ერთი სამაშველო ბრიგადაც. 

საგარეო საქმეთა სამინისტრო გაერო-ში დაგეგმილ ვიზიტთან დაკავშირებით პირველ კომენტარს აკეთებს. უწყება განმარტავს, რომ  ნიუ-იორკში დაგეგმილ 70-ე სესიაზე ორივე-პრემიერისა  და პრეზიდენტის დელეგაციები იქნებიან წარმოდგენილი. როგორც  საგანგებო დავალებათა ელჩი, საქართველოს საგარეო საქმეთა სამინისტროს სპიკერი დავით კერესელიძე განმარტავს ამ საკითხზე მუშაობა უკვე დაწყებულია.

რეჟისორი დათა ფირცხალავა ლოკარნოს კინოფესტივალის გამარჯვებული გახდა. მისი მოკლემეტრაჟიანი ფილმი მამა ფესტივალის ერთ-ერთ საკონკურსო პროგრამაში იყო წარდგენილი.

ინდონეზიური თვითმფრინავი, რომლის ბორტზეც 54 მგზავრი იმყოფებოდა, რადარებიდან გაქრა.

შეზღუდული შესაძლებლობის პირებისთვის თბილისში, ნაძალადევში, რამდენიმე კორპუსში მოწყობილი პანდუსების ხარისხს სახალხო დამცველი აკრიტიკებს.

"სეპარატისტული სოხუმის ხელისუფლებას ქართველებსა და აფხაზებს შორის სამოქალაქო ურთიერთობაც კი აშინებს" - ასეთ განცხადებას აკეთებენ პოლიტოლოგები მას შემდეგ, რაც გავრცელდა ინფორმაცია აფხაზეთში იმ გულშემატკივრების დევნის დაწყების შესახებ, რომლებიც თბილისში სუპერთასზე დასასწრებად ჩამოვიდნენ.

საგარეო საქმეთა ყოფილი მინისტრი მაია ფანჯიკიძე გაერო-ში პრეზიდენტისა და პრემიერის წასვლის შესახებ არსებულ მორიგ გაუგებრობას ეხმაურება და შარშანდელ ფაქტს იხსენებს.

მორიგი გაუგებრობა პრეზიდენტსა და პრემიერმინისტრს შორის კვლავ გაერო-ს გენერალურ ასამბლეას უკავშირდება. სექტემბრის ბოლოს ნიუ-იორკში 70-ე სესიაზე სიტყვით ირაკლი ღარიბაშვილი გამოვა. პარალელურად ირკვევა, რომ შეერთებულ შტატებში მიწვეულია პრეზიდენტი გიორგი მარგველაშვილიც, რომელსაც ასევე აქვს დაგეგმილი ოფიციალური შეხვედრები.

ხმელთაშუა ზღვაში 40 მიგრანტი დაიღუპა, როდესაც ისინი გემით ლიბიიდან ევროპაში გადასვლას ცდილობდნენ. 300–ზე მეტი ადამიანის გადარჩენა კი იტალიის საზღვაო სამაშველო სამსახურის თანამშრომლებმა შეძლეს.

თავისუფლების 70–ე წლისთავზე ჩრდილოეთ კორეა ამერიკის შეერთებულ შტატებს საპასუხო ზომების მიღებით დაემუქრა, თუ მის საზღვრებთან საერთაშორისო სამხედრო წვრთნები დაიწყება.

უკრაინის აღმოსავლეთ რეგიონებში ვითარება ყოველდღიურად იძაბება. ოფიციალური კიევი და პრორუსი სეპარატისტები ერთმანეთს მასშტაბური პროვოკაციების დაგეგმვაში ადანაშაულებენ.

სოხუმში, ადგილობრივი რეჟიმის მხარდამჭერები, სუპერთასზე თბილისში ჩამოსული აფხაზების დასჯას მოითხოვენ. ადგილობრივების ნაწილი ბარსელონა-სევილიას მატჩზე აფხაზეთიდან დედაქალაქში ჩამოსულ მოქალაქეებს, საზღვრის დარღვევაში და აფხაზი ხალხის შეურაცხყოფაში ადანაშაულებს.