Юйдегиле чачылмаз ючюн
«Стоп - развод» деген социал акцияны эсеблерине къаралды. Бу акция Къарачай-Черкесияда май айда джюрюш алгъан эди. Аны эсеблерин чыгъарыугъа аталгъан кенгешге КъЧР-ни Правительствосуну членлери, КъЧР-ни ЗАГС управлениесини джамагъат советини келечилери, тёрелик сюдюле къошулгъандыла. ЗАГС управлениени тамадасы Боташланы Рамиля айтханнга кёре, арт джыйырма джылны ичинде чачылгъан юйдегилени саны 2,5 кереге ёсгенди. КъЧР-ни ЗАГС управлениеси юйдегилени сакъларгъа джораланнган мероприятиелени планын джарашдыргъанды.
Бардырылгъан ишлени себебинден чачылыргъа хазыр болуб тургъан 19 юйдеги разводдан артха тургъанды. Аны бла бирге бу акциягъа республиканы джамагъаты тири къошулгъанын да айтыргъа тыйыншлыды.
Правительствону Председателини заместители Джанибек Суюнов «Стоп - развод» деген акция бизни республикада тыйыншлы дараджада ётгенин чертгенди.
Боташланы Рамиля бу тукъум иш мындан ары да бардырыллыгъын, «Насыблы юйдегини клубун» къураргъа излегенлерин да айтханды.