გომელაური: ბათუმში კორპუსის ჩამონგრევის მიზეზად საყრდენი კედლის გამოცლა განიხილება
"რაც მოხდა, ყველამ ნახეთ, გააშუქეთ, მთელმა საქართველომ ნახა. მძიმე სიტუაციაა ნამდვილად... დაახლოებით 5 სართულია ჩამონგრეული, ჩვენი ინფორმაციით, დაახლოებით 10-15 ადამიანი უნდა იყოს მოყოლილი შიგნით, კონტაქტზე გამოდის 2 ადამიანი, რომელიც ცოცხალია და გვესაუბრება ტელეფონით, თუმცა ვერ გვიხსნიან სად არიან... 100 და 200 ადამიანი მუშაობს, ერთმანეთს ცვლიან... სწრაფად მუშაობა ვერ გამოდის, შეიძლება რამე მოხდეს - ძალიან მაღალ, პროფესიონალურ დონეზე მუშაობენ... ჩვენი ინფორმაციით, მიმდინარეობდა სამშენებლო სამუშაოები, შეიძლება ეს იყოს მიზეზი საყრდენი კედლის გამოცლის", - თქვა გომელაურმა.
ბათუმში, 26 მაისის ქუჩაზე მრავალსართულიანი კორპუსი დაახლოებით ექვსი საათის წინ ჩამოინგრა. მისი ერთი სადარბაზო სრულად ჩამოშლილია. ადგილზე მისულია სასწრაფო დახმარების, სამაშველო სამსახურებისა და პოლიციის ჯგუფები.
როგორც რადიო თავისუფლების ადგილობრივი კორესპონდენტი ამბობს, ათეული წლების წინ აშენებულ 5-სართულიან კორპუსს ორი სართული რამდენიმე წლის წინ დააშენეს.