ოკუპირებულ სამხრეთ ოსეთში „Спутник V“-ით ვაქცინაცია დაიწყო
დე ფაქტო სამხრეთ ოსეთის ე.წ. ჯანდაცვის სამინისტროს მთავარი თერაპევტის, ამბულატორიულ-პოლიკლინიკური ცენტრის ხელმძღვანელის, თამარ სანაკოევას განმარტებით, აცრა 6 ადამიანს ჩაუტარდა.
როგორც თამარ სანაკოევამ უთხრა სააგენტო "რესს", პირველ რიგში ვაქცინაცია შეეხებათ სამედიცინო პერსონალსა და განათლების სფეროს მუშაკებს. მისივე თქმით, ცხინვალის გარდა, ვაქცინაცია ჩატარდება ასევე რაიონულ საავადმყოფოებშიც.
„Спутник V“-ის პირველი პარტია, ვაქცინის 2 000 დოზა, ცხინვალში, 4 კონტეინერით 30 აპრილს ჩაიტანეს.
ამავე დღეს რუსეთისგან რუსული კოვიდსაწინააღმდეგო ვაქცინის Спутник V-ის პირველი პარტია - 6,5 ათასი დოზა მიიღო ოკუპირებულმა აფხაზეთმა. Apsnypress-ის ინფორმაციით, ვაქცინაციის დაწყება აფხაზეთში მაისის დღესასწაულების შემდეგ იგეგმება.
საქართველოს მთავრობამ ოკუპირებულ რეგიონებში მცხოვრებ მოქალაქეებს მარტის ბოლოს შესთავაზა ცენტრალური ხელისუფლების მიერ კონტროლირებულ ტერიტორიაზე მიმდინარე აცრის პროცესში ჩართვა და, შესაბამისად, „ფაიზერის“ და „ასტრაზენეკას“ ვაქცინების გაკეთება. საპასუხოდ, დე ფაქტო რესპუბლიკებში განაცხადეს, რომ მოსახლეობის ვაქცინაცია განიხილება „მოკავშირისა და სტრატეგიული პარტნიორის, რუსეთის ფედერაციის დახმარებით“.