Эмомалӣ Раҳмон: "80% муҳоҷирон натавонистанд ба хориҷ раванд"

Раиси ҷумҳури Тоҷикистон гуфт, ки дар соли 2020 бо сабаби баста будани роҳҳо, ҳудуди 80 дарсади муҳоҷирони тоҷик натавонистаанд ба хориҷ раванд.

Дар ин бора Эмомалӣ Раҳмон рӯзи 26-уми январ зимни ироаи паём ба порлумон изҳор дошт. Ба гуфтаи оқои Раҳмон, аз 460 ҳазор муҳоҷири тоҷик, танҳо 111 ҳазори онҳо тавонистанд барои кор ба беруни кишвар раванд.

Эмомалӣ Раҳмон дар паёмаш берун аз варақ гуфт, чунин вазъ нишон медиҳад, ки дар дохили кишвар метавон муҳоҷиронро дар соҳаи саноат ва кишоварзӣ ба кор таъмин кард.

Вале муҳоҷироне, ки натавонистаанд ба Русия раванд, мегӯянд, вазъашон дар дохили кишвар хуб нест ва интизоранд, ки ҳарчи зудтар роҳҳо боз шаванд.

Аз моҳи марти соли гузашта роҳҳо ба Русия, кишвари аслии кор барои муҳоҷирони тоҷик баста аст.

Ҳамасола беш аз як миллион шаҳрванди тоҷик дар ҷустуҷӯи ҷойи кор умдатан озими Русия мешаванд. Аммо, баъд аз хуруҷи бемории ҳамагири COVID 19 дар баҳори соли гузашта марзҳо баста ва парвозҳои мунтазам миёни ин ду кишвар қатъ шуданд. Дар тӯли як соли ахир садҳо ҳазор муҳоҷири кории тоҷик натавонистанд тибқи маъмул худро барои кор то ба Русия расонанд.

Ҳукумати Тоҷикистон иқрор кардааст, пулфиристии муҳоҷирон дар соли гузашта кам шуда, оилаҳои камбизоат дар Тоҷикистон бештар шудаанд. Оилаҳои камбизоат дар Тоҷикистон нисбат ба оилаҳои миёнҳол, бештар ба пули муҳоҷират вобастаанд.

Ҳамасола раиси ҷумҳури Тоҷикистон дар паёми солонаи худ ба ҳарду палатаи порлумони кишвар ҳадафҳои кӯтоҳмуддат ва дарозмуддати давлати Тоҷикистонро шарҳ медиҳад. На ҳамеша ин паёмҳо баёнгари вазъи воқеӣ дониста мешаванд ва ба гуфтаи сокинон, на ҳамаи нақшаҳое, ки дар паём эълон мешаванд, ба иҷро мерасанд.