პაატა ზაქარეიშვილი: ეპროპარლამენტარების განცხადებებზე „ქართული ოცნების“ დამოკიდებულებაა: „აი დარდი“ – მათ არ უნდათ ევროკავშირი
მიხეილ სააკაშვილი თუ გარდაიცვალა, ყველა ვიდარდებთ, დარწმუნებული ვარ, თვითონაც იდარდებენ და მორჩა, ამოისუნთქავენ , – ამის შესახებ პოლიტოლოგმა პაატა ზაქარეიშვილმა „პალიტრანიუსის“ გადაცემა „დღის ნიუსრუმში“ მიხეილ სააკაშვილის ჯანმრთელობის მდგომარეობის მიმართ „ქართული ოცნების“ დამოკიდებულებაზე საუბრისას განაცხადა.
პაატა ზაქარეიშვილის განცხადებით, თუ მიხეილ სააკაშვილს გაიყვანენ პოლიტიკური სცენიდან, „ქართული ოცნებისთვის“ ძალიან დიდი შვება იქნება, რადგან აღარაფერი დაემუქრებათ.
„თუ სააკაშვილი დაზიანდება, მოკვდება ან იმდენად დაინვალიდდება, რომ პოლიტიკაში ყოფნას ვეღარ მოახერხებს, მგონი, „ქართული ოცნების“ მთავარი ამოცანაა. სამწუხაროდ, საქართველოში დღემდე ვერ შეიქმნა მასთან მიახლოებული ფიგურაც კი, ოდიოზურიც კი, ყველანაირი. ფაქტია, ვერ შეიქმნა და თუ მას გაიყვანენ პოლიტიკური სცენიდან, ეს იქნება ძალიან დიდი შვება „ქართული ოცნებისთვის“, დიდხანს მათ არაფერი არ დაემუქრებათ. „ოცნება“ როგორც თამაშობს ნატო-სთან და ევროკავშირთან, ამბობს მივდივართ და ამ დროს არ მივდივართ, სააკაშვილთანაც ასე თამაშობს, თამაშობს მის ჯანმრთელობაზე. ამბობენ: „ჩვენ ვუვლით, ვპატრონობთ“ და თუ გარდაიცვალა, ყველა ვიდარდებთ, თვითონაც იდარდებენ დარწმუნებული ვარ და მორჩა, ამოისუნთქებენ. მე მათგან ყველაზე ცუდ ვარიანტებს ველოდები. ისინი თითქმის დარწმუნებული არიან, სააკაშვილს რამე რომც მოუვიდეს, ხალხი გამოვა ქუჩაში, იქნება გარკვეული პრობლემები, მაგრამ დარწმუნებულები არიან, რომ იმდენად არაპოპულარულია სააკაშვილი, რომ ეს ყველაფერი ჩაიფარცხება და თვითონ დარჩებიან ხელისუფლებაში“, – განაცხადა პაატა ზაქარეიშვილმა.
პაატა ზაქარეიშვილი ევროპარლამენტარების მიერ მიხეილ სააკაშვილის შესახებ გაკეთებულ განცხადებებსაც გამოეხმაურა და აღნიშნა, რომ „ქართლ ოცნებას“ მათი კრიტიკული განცხადებები არ ადარდებს.
„ „აი, დარდი“ – დარწმუნებული ვარ, ასეთი დამოკიდებულება აქვთ. მათ არ უნდათ ევროკავშირი, რადგან ევროკავშირი არის მოთხოვნები დემოკრატიაზე, განსხვავებით რუსეთისგან, რომელიც არაფერს ითხოვს. მთავარი პირობაა, რომ საქართველომ არ შეუქმნას რუსეთს დისკომფორტი, რომ საქართველო არის ისეთივე მსხვერპლი, როგორც უკრაინაა და დღეს, რაც ხდება უკრაინაში რუსეთ-უკრაინის პრობლემაა. რაც მოხდა 2008 წელს, თურმე მხოლოდ სააკაშვილის ბრალი ყოფილა. მე კარგად ვიცი, რა მოხდა 2008 წელს, კობახიძეს წარმოდგენა არ აქვს, მაგრამ დღეს ის ხელისუფალია და უნდა ილაპარაკოს არა წარსულზე, არამედ დღევანდელობაზე. სამარცხვინოა, როცა დღემდე ლაპარაკია წარსულზე, მაშინ ბარემ ჰიტლერზე ილაპარაკონ და პირველ მსოფლიო ომზე.
რაც არ უნდა ეფერონ ევროპას, ევროპა მათ მოსთხოვს თავისუფალ არჩევნებს, მართლმსაჯულებას, დეცენტრალიზაციას, ადამიანის უფლებებს. ევროპას არ სჭირდება კარგი დამოკიდებულება საქართველოსგან, ევროპას სჭირდება ღირებულებები, ხოლო რუსეთს არ სჭირდება, მეგობრობაც არ სჭირდება“, – განაცხადა პაატა ზაქარეიშვილმა.
ამასთან, პაატა ზაქარეიშვილის თქმით, თუ საქართველო დემოკრატიული განვითარების გზას არ დაადგა, ევროკავშირს მეორე უნგრეთი არაფერში სჭირდება.
„ევროკავშირს არ სჭირდება ახალი უნგრეთი ევროკავშირში. საქართველომ ამ ფორმით რომ მიიღოს კანდიდატობის სტატუსი, თავში აუვარდება და ყველაფერს მიიწერს თვითონ. იტყვიან, „ხომ ხედავთ ჩვენ რას ვაკეთებდით და მაინც მოგვცეს“ და კიდევ მეტად გააგრძელებენ ანტიდემოკრატიულ მოძრაობას. ეს ევროკავშირს კარგად ესმის. მათ საქართველო ქართული ღვინის გამო ხომ არ უყვართ, მათ სჭირდებათ სანდო პარტნიორი კავკასიაში და თუ საქართველო ანტიდემოკრატიულია, რაში სჭირდებათ მათ ეს ტერიტორია, რომ გააძლიერონ რუსული კომპონენტი ევროკავშირში? – ასი წელი არ სჭირდებათ მათ ეს“, – განაცხადა პაატა ზაქარეიშვილმა.