იაგო ხვიჩია: გვინდა ვისაუბროთ ეკლესიასთან, ჩვენ საქმიანობაში რა არის ანტიქრისტიანული, ჩვენ მიგვაჩნია, რომ …

არცერთ ჩემს კოლეგას, მთავრობის არცერთ წევრს, საკუთარი ოჯახის წევრები ჯარში არ გაუშვია, შეიძლება იყოს გამონაკლისი და იმ ხალხს ბოდიშს ვუხდი, მაგრამ მე ვეძებ და ჯერ ასეთი კაცი არ მინახავს, – ამის შესახებ „გირჩის“ ერთ-ერთმა ლიდერმა, იაგო ხვიჩიამ ტელეკომპანია „პალიტრანიუსის“ გადაცემაში „ნიუსრუმი“ განაცხადა.

მისივე თქმით, ადამიანს, რომელსაც არ უნდა კონკრეტული საქმის კეთება, იმ საქმეს არ უნდა აკეთებდეს.

„ჯარის გულშემატკივრობა „ქართული ოცნების“ მხრიდან არ გამოიყურება დამაჯერებლად. მას შემდეგ, რაც უკრაინაში ომი დაიწყო, რამდენ შარში გაეხვა ჯარისკაცებთან დაკავშირებით და ზოგადად ამ პოლიტიკურ პოზიციონირებასთან დაკავშირებით „ქართული ოცნება“. ზოგადად მოგეხსენებათ იუნკრების საფლავზე ომის დაწყების მეორე დღეს ნათქვამი სიტყვები პრემიერ – მინისტრის. ახლა კრიტიკა იმასთან დაკავშირებით, რომ ჩვენ ვაკეთებთ ანტიეროვნულ საქმეს, ვებრძვით ქართულ თავდაცვას და ა.შ. მაშინ, როდესაც ერთადერთი პარტია ვართ, რომელიც ვითხოვდით მინიმუმ გაორმაგებას თავდაცვის ბიუჯეტის, ანუ ყოველთვის ვითხოვდით პროფესიონალურ არმიას, იქიდან გამომდინარე, რომ ზუსტად ვიცით და გვჯერა, რომ ადამიანი, რომელსაც არ უნდა კონკრეტული საქმის კეთება, იმ საქმეს არ უნდა აკეთებდეს. არ შეიძლება ის მას ხარისხიანად გამოუვიდეს და როდესაც ისეთ საპასუხისმგებლო საქმეს, როგორიც არის ჯარისკაცობა, ანდობ ადამიანს, რომელიც ამ საქმეში იძულებით გყავს გაწვეული და მეორე გვერდში მყოფმა ნამდვილმა ჯარისკაცმა იცის, რომ ის იბრძვის ისეთი კაცის გვერდზე, რომელსაც ბრძოლა არ უნდა, ეს ხომ იმ ჯარისკაცის უფლების დარღვევაა, რომელიც მართლა ჯარისკაცია.

მაშინ, როდესაც არცერთ ჩემს კოლეგას, თუ ვცდები ვინმემ გამისწოროს, მთავრობის არცერთ წევრს, საკუთარი ოჯახის წევრები არ გაუშვია ჯარში, შეიძლება იყოს გამონაკლისი და იმ ხალხს ბოდიშს ვუხდი, თუ გამოჩნდებიან, მაგრამ მე ვეძებ და ჯერ ასეთი კაცი არ მინახავს, ამ პირობებში, როცა ყველა სხვადასხვა ფორმას პოულობს საკუთარი შვილებისთვის ჯარში წასვლისგან ასაცილებლად, ამბობ, რომ შენ ხარ მშვიდობის პარტია, ვინმე ამ თვალსაზრისით რამეს იტყვის კრიტიკულს ამბობს, რომ აბა ომი გინდა?! ამ დროს ამბობ, რომ მთელ ქვეყანას სავალდებულო სამხედრო სამსახური გავლილი უნდა ჰქონდეს. ეს არის სრულიად „დომხალი“, რაც არის მოწყობილი, ხომ არაფერში არ წერია და ხომ აჩენს განცდას, რომ სინამდვილეში ამით გინდა, რომ გადაფარო ის მცდარი განცხადებები, რომელიც ჯართან დაკავშირებით გქონდა ბოლო პერიოდში, რუსეთ-უკრაინის ომთან დაკავშირებით. თითქოს გულშემატკივარია ჯარის და ჯარისკაცების. ჩემი აზრით, „ქართულ ოცნებას“ ეს სხვანაირად აქვს დასამტკიცებელი და არა იმით, რომ ყველა ადამიანი ჯარში ძალით გარეკოს, მათ უნდა თუ არ უნდა იქ წასვლა. ამ ცვლილებით, საქართველოს ხელისუფლება ჩადის ანტიქრისტიანულ საქმეს და ამბობს, რომ ეს არის შეთხზულიყო საპატრიარქოსთან. ამ მხრივ, ჩვენ გვინდა ვისაუბროთ ეკლესიასთან, ჩვენ საქმიანობაში რა არის ანტიქრისტიანული, რადგან ჩვენ მიგვაჩნია, რომ მონების გათავისუფლება ყველაზე ქრისტიანული საქმეა, გვინდა საჯარო დებატები და დისკუსიები ამ თემასთან დაკავშირებით“,- განაცხადა იაგო ხვიჩიამ.