ნანა გეგეჭკორი: არც ერთი პრეზიდენტის სიცოცხლე არ ღირს რომელიმე სხვა ადამიანის სიცოცხლეზე მეტი, მაგრამ არც ნაკლები ღირს
0
“როცა ადამიანები სხვებზე საუბრობენ, განსაკუთრებით თავიანთ მტრებზე, ამ დროს საკუთარ ამბავს ყვებიან…
როგორ?
როცა ამბობთ, ყოფილ პრეზიდენტს ბევრი ცოდვა მიუძღვის და დამსახურებულად იტანჯება – ამ დროს ყვებით, რომ თალიბანის ან მასთან მიახლოებული ველური ტომების მსგავსად ადამიანების ლინჩის წესით გასამართლებას ემხრობით. ასე უხდიდნენ ადამიანები სამაგიეროს ერთმანეთს მაშინ, როცა გამოქვაბულში ცხოვრობდნენ და უკეთეს შემთხვევაში ცხოველების ხორცს უმად მიირთმევდნენ. პერიოდულად კი ერთმანეთსაც სიამოვნებით შეექცეოდნენ.
როცა გვიმტკიცებთ, რომ ყოფილი პრეზიდენტი და ლამის ყველა თქვენი ყოფილი თანამებრძოლი, ვისთანაც ერთად წლები ერთ გუნდში გიმუშავიათ, ვისთვისაც საარჩევნო ხმებს კარდაკარ იხვეწებოდით, ბოროტი მეგალომანები, უსნდისო სპონსორების ფულს დახარბებული საშინებელებები არიან – ამ დროს ყვებით, რომ მთელი ეს წლები რაც აკეთეთ ყველაფერი შეცდომა იყო, რადგან ამ მეგალომანების ერთგული თანამებრძოლები იყავით, რომ ყველა თანამებრძოლში ძალიან შეცდით, რომ წლები გაატარეთ ადამიანებთან და ვერ ამოიცანით რომ ისინი ღირებულების არმქონე, მერკანტილური ინტერესებით შეპყრობილი არარაობები იყვნენ. ამით გვიყვებით, რომ თქვნ არც პოლიტიკური ალღო გაქვთ, არც ადამიანების ამოცნობა შეგიძლიათ და უდიდესი ალბათობით მომდევნო ხუთი-ათი წლის განმავლობაში ახალ დამპალ ვაშლებს უნდა ველოდოთ თქვენი გუნდის კალათიდან. თუ ცხოვრების ლამის ერთი მესამედი ყველაში ცდებოდით, ხვალ რატომ უნდა აღმოჩნდეთ სანდო?
როცა თქვენი ქვეყნის ჯანდაცვის სისტემის ერთ-ერთ თანამედროვე ნაწილად აღიარებულ ჰოსპიტალში, ყველაზე რეზონანსული პაციენტი ექიმებს ხელიდან ეცლებათ, თვეების, ათეულობით ათასი დახარჯული ლარის, ასეულობით გვერდზე მოთხრობილი დიაგნოსტიკური კველვების მიუხედავად დიაგნოზიც კი ვერ დაუსვამთ და თქვენ ამტკიცებთ რომ პაციენტს ყველაფერი უკეთდება – ამით ყვებით, რომ თქვენთვის საკუთარი სიცოცხლის ნდობა არ შეიძლება, რადგან რისკების ანალიზის მინიმალური უნარიც კი არ გაგაჩნიათ. ვერ აცნობიერებთ, რომ ქვეყანაში სადაც მაღალი ინტერესის ობიექტი პაციენტი არაა დაცული, თქვენი სიცოცხლე სრულიად უმნიშვნელოა და იმ ჰოსპიტალში რომ მოხვდეთ და სერიოზული დახმარება დაგჭირდეთ, ვერც კი გაიგებს ვინმე რომ ვერ გადარჩით… როგორ ექცევიან პენიტენციალური და ჯანდაცვის სისტემა ყოფილ პრეზიდენტს ეს გეუბნებათ იმას რა ხარისხის სერვისს მიიღებთ თქვენ იმავე გარემოში რომ მოხვდეთ და რამდენად იქნება დაცული თქვენი უფლებები რა გინდა რა მიზეზით სამართლის ძიება რომ დაგჭირდეთ.
მიხეილ სააკაშვილის თავს რაც ხდება დღეს, ეს თითოეული თქვენგანის, თქვენი შვილების და საყვარელი ადამიანების ამბავია და თუ ამას ვერ აცნობიერებთ – მაშინ საკუთარ თავზე გვიყვებით, რომ თქვენს ირგვლივ მიმდინარე ამბების მინიმალური ანალიზის უნარი არ გაქვთ.
არც ერთი პრეზიდენტის სიცოცხლე არ ღირს რომელიმე სხვა ადამიანის სიცოცხლეზე მეტი, მაგრამ არც ნაკლები ღირს. დამნაშავე რომც იყოს, საქართველოს კანონმდებლობით, სიკვდილით ან წამებით დასჯა დაშვებული არაა. თუ ამას ვერ აცნობიერებთ, მიუხედავად იმისა რომ, შეიძლება ახლა ამ სტატუსის ქვეშ საზიზღრობებს რომელიმე ძვირადღირებული გაჯეტიდან აკაკუნებთ, ცნობიერებით გამოქვაბულის დროინდელ ადამიანს ვერ სცილდებით,” – წერს სოციალურ ქსელში ექიმი, კარდიოლოგი ნანა გეგეჭკორი.