პრეზიდენტის ადმინისტრაციამ „ალტ-ინფო“ ბრიფინგზე არ დაუშვა

პრეზიდენტის ადმინისტრაციამ პრორუსული და ძალადობრივი პლატფორმა „ალტ-ინფოს“ ბრიფინგზე დასასწრებად მედიააკრედიტაცია არ მისცა და გადამღები ჯგუფი ადმინისტრაციის შენობაში გასაშუქებლად ვერ შევიდა.

გუშინ, 11 აპრილს, 18:00 ორბელიანების სასახლეში პრეზიდენტმა სალომე ზურაბიშვილმა ევროკომისიის კითხვართან დაკავშირებით ბრიფინგი გამართა.

„ალტ-ინფო“ გუშინდელ გადაცემაში გასულ სიუჟეტში აღნიშნავდა: „პრესცენტრს მინდა, რომ გავესაუბრო – ყველა ჟურნალისტი შეუშვეს აბსოლუტურად, ჩვენ გარდა. სამი საათით ადრე, როგორც კი ჩაინიშნა პრეზიდენტის ბრიფინგი, მაშინვე გადმოაგზავნა ჩემმა პროდუსერმა, თუმცა შეუშვეს ყველა და უკვე მე-2 შემთხვევაა, როცა მე არ მიშვებენ“, – ამბობს „ალტ-ინფოს“ წარმომადგენელი სიუჟეტში.

პრეზიდენტის ადმინისტრაციაში „პუბლიკას“ უდასტურებენ ინფორმაციას, რომ პრორუსული და ძალადობრივ პლატფორმა „ალტ-ინფოს“ მედიააკრედიტაცია არ მისცეს. დამატებით შეკითხვებს უწყებაში ამ ეტაპზე არ პასუხობენ.