Ռիո-2016-ի նորամուծությունները

Ռիո դե Ժանեյրոն պատրաստվում է Օլիմպիական խաղերին: Այս քաղաքում կայանալիք ամենակարեւոր սպորտային իրադարձության ժամանակ շատ բաներ տեղի են ունենալու առաջին անգամ:

Mediamax Sport-ն իր հատուկ նախագծում առանձնացրել է այն ամենն, ինչը պատմության մեջ կմտնի ու կվերագրվի հենց 31-րդ Օլիմպիադային:

Հարավային Ամերիկայի առաջին Օլիմպիադան

«Ինչպես ամեն մրցման ժամանակ, այստեղ եւս մեկ հաղթող պետք է լինի: Ես պատիվ ունեմ ասելու, որ Օլիմպիական 31-րդ խաղերը կայանալու են Ռիո դե Ժանեյրոյում»,- 2009 թվականին Կոպենհագենում կայացած նստաշրջանի ժամանակ հայտարարեց ՄՕԿ-ի նախագահ Ժակ Ռոգեն:

Փաստորեն, Բրազիլիան դարձավ հարավամերիկյան առաջին երկիրը, որն իրավունք ստացավ կազմակերպել Օլիմպիական խաղեր:

Բրազիլացիների թիմն այնքան էր ուրախացել, որ հաղթանակը նշելու ժամանակ սկսեց կատարել Ռիոյի օրհներգը՝ Cidade Maravilhosa-ն (Սքանչելի քաղաք):
[[gallery1]]
Իսկ երկրի այն ժամանակվա նախագահ Լուիս Ինասիո Լուլա դա Սիլվան ասաց. «Աշխարհը հասկացավ, որ Բրազիլիայի ժամանակը եկել է»:

Այս ամենն ուղիղ եթերով տեսել են Կոպակաբանայում հավաքված հազարավոր բրազիլացիներ, ովքեր ազգային դրոշի գույներով են ներկել ծովն ու սամբա պարելով նշել հաղթանակը:

Ըստ կազմակերպիչների՝ խաղերն ողջ Հարավային Ամերիկայինն են. «Մեր մայրցամաքն առաջին անգամն է հյուրընկալելու այսպիսի կարեւոր իրադարձություն, ու երկրպագուները հաստատ չեն զղջա այստեղ գալով: Ռիոն անցկացնելու է ամենաանմոռանալի խաղերը»:  

Ռիոն 1968 թվականի Մեխիկոյի Օլիմպիական խաղերից հետո երկրորդ քաղաքն է, որն ընդունելու է Լատինական Ամերիկան: Այսպիսով, չհաշված Անտարկտիդան, մնաց միայն Աֆրիկա մայրցամաքը, որտեղ դեռ Օլիմպիական խաղեր չեն կայացել:

Նոր մարզաձեւեր Ռիոյում

2016-ին մարզասերները Ռիոյում կտեսնեն գոլֆ եւ ռեքբի-7, որոնք ընտրվել են քվեարկության արդյունքում:

Ռեքբին նորամուտը նշել է 1900 թվականին, իսկ վերջին անգամ ներկայացված է եղել 1924-ին: Գոլֆն էլ վերադառնում է 112 տարի անց: Այս ձեւում մրցելու են ինչպես տղամարդիկ, այնպես էլ կանայք:
[[gallery2]]
«Այս մարզաձեւերը մեծ մասսայականություն են վայելում ու կլրացնեն Օլիմպիական խաղերը, -հայտնել էր Ժակ Ռոգեն:

Նոր երկրներ Օլիմպիադայում

Բրազիլիայում խաղարկվելու են ռեկորդային թվով՝ մեդալների 306 հավաքածու, ու սպասվում է 206 երկրի մասնակցություն: Առաջին անգամ Օլիմպիական խաղերում ելույթ կուենան Կոսովոյի ու Հարավային Սուդանի մարզիկները:

Այս երկրները պաշտոնապես դարձել են ՄՕԿ-ի 205 եւ 206-րդ անդամները: Նրանք մի քանի տարի է ինչ անկախ են, ունեն տարբեր հակամարտություններ ու չեն ճանաչվել այլ պետությունների կողմից:
[[gallery3]]
ՄՕԿ-ում համոզված են, որ սպորտը խաղաղություն հաստատելու լավագույն միջոցն է, ու իրենք փորձում են օգնել լուծել առկա տարաձայնությունները:

Փախստականների ներկայությունը Ռիոյում

Փախստականների ու ներգաղթյալների 5-10 հոգուց բաղկացած թիմն առաջին անգամ ելույթ կունենա Ռիոյի Օլիմպիական խաղերում: Թիմը հանդես է գալու Միջազգային Օլիմպիական կոմիտեի դրոշի ու օրհներգի ներքո:

ՄՕԿ-ի նախագահ Թոմաս Բախը հայտարարել է, որ փախստական մարզիկները չունեն իրեց օլիմպիական կոմիտեները, չունեն հայրենիք, որի դրոշի ներքո կարող են հանդես գալ: Դրա համար էլ իրենք ցանկանում են օգնել նրանց:
[[gallery4]]
ՄՕԿ-ը ցանկանում է ողջ աշխարհի ուշադրությունը սեւեռել փախստականների խնդրին, որոնց թիվը հասել է 60 մլն-ի:

Օլիմպիական խաղերի բացման շքերթի ժամանակ առաջինը, ինչպես տեղի է ունենում ավանդաբար, անցնելու է Հունաստանի հավաքականը, իսկ վերջինը՝ փախստականների թիմը:

Գոհար Նալբանդյան

Նախագծի գործընկեր