Kosova regjistron edhe 14 raste me koronavirus

Katërmbëdhjetë raste me koronavirus u raporton të enjten në Kosovë, bëri të ditur Ministria e Shëndetësisë.

Sipas raportit të saj ditor, rastet e reja pozitive rezultuan pas testimit të 1,707 mostrave.

Në 24-orëshin e kaluar nuk u regjistrua asnjë viktimë nga koronavirusi, ndërsa u shëruan 16 pacientë.

Aktualisht, raste aktive me koronavirus në Kosovë janë 443.

Me shifrat e javëve të fundit, Kosova është vendi me normën më të ulët të infeksionit në rajonin e Ballkanit Perëndimor.

Për krahasim, pozitiviteti i rasteve në Kosovë aktualisht është nën 1 për qind, ndërsa në Mal të Zi është mbi 23 për qind.

Deri të enjten, në Kosovë janë dhënë mbi 1.5 milion vaksina kundër koronavirusit.

Mbi 735,000 qytetarë janë vaksinuar plotësisht.

Këtë javë, Ministria e Shëndetësisë e Kosovës ka miratuar vaksinimin edhe të fëmijëve të moshës 12 deri në 15 vjeç.

Deri më tash, të gjithë personat mbi 16 vjeç kanë mundur të vaksinohen.