Rasti Khashoggi: Hetuesit turq bastisin rezidencën e konsullit saudit

Hetuesit turq hynë në rezidencën e konsullit saudit në Stamboll, për të mbledhur më shumë prova rreth zhdukjes së gazetarit saudit, Jamal Khashoggi.

Zyrtarët turq besojnë se Khashoggi, kritik i udhëheqjes saudite, është vrarë gjatë një vizite në ndërtesën e konsullatës, më 2 tetor, por Riadi e mohon.

Konsulli Mohammed al-Otaibi udhëtoi për në Riad të martën. Ai thotë se nuk ka dijeni se çfarë i ka ndodhur Khashoggit.

Megjithatë, sipas një gazete turke, Otaibi mund të dëgjohet në disa audio-incizime që supozohet se dëshmojnë vrasjen e Khashoggit.

Më herët, sekretari amerikan i Shtetit, Mike Pompeo, takoi në Ankara presidentin e Turqisë, Recep Tayyip Erdogan, dhe ministrin e Jashtëm të këtij vendi, Mevlut Cavusoglu, për të diskutuar rastin e gazetarit.

Cavusoglu nuk dha detaje për takimet, por i përshkroi ato si "të dobishme" dhe "të frytshme".

Pompeo nuk iu adresua gazetarëve, por Departamenti amerikan i Shtetit tha përmes një deklarate se ai e ofroi mbështetjen e SHBA-së në hetimet që po bën Turqia rreth zhdukjes së Khashoggit.

Të martën, Pompeo takoi në Riad mbretin e Arabisë Saudite, Salman, dhe princin e kurorës, Muhammad, i cili ka qenë një nga shënjestrat kryesore të kritiave të Khashoggit.

Pompeo tha se ka theksuar se sa e rëndësishme është që autoritetet saudite të kryejnë hetime të plota të rastit dhe se ato janë zotuar se do të bëjnë një gjë të tillë.