Ճիշտ չէ Արթուր Սարգսյանի մահվան վրա դիվիդենտներ շահել․ Շարմազանով
Հանրապետական կուսակցության խոսնակ Էդուարդ Շարմազանովը կուսակցության Գործադիր մարմնի նիստի ավարտից հետո անդրադարձավ «Հաց բերող» անունը ստացած Արթուր Սարգսյանի մահվանը:
«Մեր ցավակցությունն եմ հայտնում, բոլորիս անունից: Ցանկացած հայ մարդու կորուստ ցավալի է մեզ համար», - ասաց Շարմազանովը:
Շարմազանովը նաև ընդգծեց՝ անընդունելի է նախընտրական փուլում Սարգսյանի մահվան փաստը շահարկել:
«Կան մարդիկ, որ անկեղծորեն են ցավում: Բայց չեմ կարող չասել, սա վերաբերում է նրանց, ովքեր փորձում են այս դժբախտությունը վերածել նախընտրական կրքերի, կամ դիվիդենտներ շահելու: Սա անթույլատրելի է: Սա ողբերգություն է, և սրա վրա փորձել դիվիդենտներ շահել, ես ճիշտ չեմ համարում», - ասաց Էդուարդ Շարմազանովը:
«Ինչ վերաբերում է [իշխանության հասցեին] մեղադրանքներին, որքան ես տիրապետում եմ ինֆորմացիային, կարծում եմ այդ ինֆորմացիան հնարավորինս մոտ է օբյեկտիվինի, Արթուր Սարգսյանի հացադուլի ժամանակ մի քանի անգամ նրա բուժող բժիշկները, շտապօգնությունը նրան առաջարկել են որպեսզի նա տեղափոխվի քաղաքացիական հիվանդանոց, նա մերժել է: Այս ամենը արձանագրված է:
Ես ծանոթ եմ փաստաբանի հայտարարությունը: Այնտեղ կասկած է հնչում մահվան պատճառների՝ բժիշկների գնահատականի հետ կապված: Եթե փաստաբանները կամ հասարակությունը կամ բարեկամները պնդում են և կարծում են, որ անհրաժեշտ է փորձաքննություն, ես որևէ խնդիր չեմ տեսնում: Եվ եթե պարզվի փորձաքննության արդյունքում, որ ինչ-որ անբարեխիղճ գործողություններ են կատարվել, օրենքի խախտում է տեղի ունեցել, առանց վարանելու կարող եմ հայտարարել, որ մեղավորները կպատժվեն», - ասաց ՀՀԿ խոսնակը: