Բարաք և Միշել Օբամաները կհրատարակեն իրենց հուշագրությունները
Միացյալ Նահանգների նախկին նախագահ Բարաք Օբաման և նրա կինը՝ Միշել Օբաման Penguin Random House հրատարակչության հետ պայմանագիր են ստորագրելու իրենց հուշագրությունները հրատարակելու վերաբերյալ: Այս մասին հայտնում է Reuters լրատվական գործակալությունը:
Գործարքի մանրամասները պաշտոնապես չեն հաղորդվում: Միայն հայտնի է, որ մեկ գիրք գրելու է Բարաք Օբաման, երկրորդը՝ Միշելը:
Financial Times-ի տվյալներով՝ հրատարակչությունը Օբամաներին վճարելու է ավելի քան 60 միլիոն դոլար, ինչը, պարբերականի գնահատմամբ, ռեկորդային թիվ է: 2004 թվականին Բիլ Քլինթոնը 15 միլիոն դոլար է ստացել իր հուշագրությունները հրատարակելու դիմաց, իսկ Ջորջ Բուշը՝ մոտ 10 միլիոն:
Penguin Random House հրատարակչությունը արդեն հրապարակել է Օբամայի երեք նախորդ գրքերը, այդ թվում «Հորս երազանքները» ինքնակենսագրությունը՝ ծնվելուց մինչև Հարվարդի համալսարան ընդունվելը: