ԿԳՆ-ն չի համագործակցելու «Չումբո» նախաձեռնության հետ
Անցյալ տարվա մայիսին մանկապատանեկան դիսկոտեկներ կազմակերպած և մասնագետների քննադատությանն արժանացած «Չումբո» խումբը օրերս հայտարարել էր, որ հանդիպել է Կրթության և գիտության նախարարին ու փոխնախարարին, և «երկու ժամ տևած ջերմ զրույցի» ավարտին որոշվել է Հայաստանի բոլոր հիմնական և ավագ դպրոցների, բուհերի և այլ կրթական հաստատությունների միջոցառումների կազմակերպումը վստահելում է հենց իրենց։
Կրթության և գիտության նախարարության հանրակրթության վարչության պետ Աշոտ Արշակյանն պնդում է, թե կայացածը ընդամենը աշխատանքային հանդիպում էր․ - «Պաշտոնապես հայտարարում եմ, որ Կրթության և գիտության նախարարությունը այդ կազմակերպության հետ որևէ համագործակցություն չի ունեցել և չի կարող ունենալ։ Ցանկացած նախաձեռնությունը, որը կարող է օգուտ բերել կրթության համակարգին, ողջունելի է: Բայց տվյալ կազմակերպությունը պետք է ներկայացնի հստակ ծրագիր: Որևէ ծրագիր չի ներկայացվել»:
Ի տարբերություն Կրթության և գիտության նախարարության, Երևանի քաղաքապետարանը «Չումբո»-ի ծրագիրը ստացել է, սակայն, քաղաքապետարանի աշխատակազﬕ հանրակրթության վարչության պետ Աննա Սեփանյանի փոխանցմամբ՝ իրենք դրան բացասական գնահատական են տվել․ - «Ամբողջությամբ ունեցել ենք բացասական վերաբերմունք: Ունեցել ենք վերլուծություն, քանզի անցյալ միջոցառման հետ կապված ունեցել ենք քննարկումներ մանկավարժների հետ, տնօրենների հետ, ովքեր ունեցել ենք իրենց բացասական վերաբերմունքը: Եվ այս վերաբերմունքի հիման վրա, կարդալով նաև իրենց իսկ ներկայացրած ծրագիրը, ես դեմ եմ արտահայտվել այս ծրագրին»:
Նախորդ տարի «Ազատությունը» ներկա է եղել Երևանի ավելի քան 10 դպրոցների 1-10 դասարանների աշակերտների համար միաժամանակ կազմակերպված խնջույքին։ Տոթ, պատշաճ օդափոխություն չունեցող սրահում դասերից հետո հարյուրավոր երեխաների վաճառվում էր ջուր, չիպսեր, տորթեր:
Երևանի ավագանու անդամ Արայիկ Հարությունյանն ասում է, որ մինչ Կրթության և գիտության նախարարությունն ու քաղաքապետարանը իրենց եզրակացությունները կտային, «Չումբո»-ն հասցրել է շուրջ 90 դպրոցների հետ համագործակցել։ Ավագանու անդամի խոսքով, հենց քաղաքապետարանը բանավոր համաձայնություն է տվել, որից հետո էլ «Չումբո»-ն առնվազն տարակուսելի ժամանցային միջոցառումներ է կազմակերպել։