Վրաստանի վարչապետը ժամեր առաջ հետաձգել է իր այցը Հայաստան
Վրաստանի կառավարության լրատվական ծառայության ղեկավար Սոֆո Մոսիձեն «Ազատության» հետ զրույցում ասաց, թե վարչապետի հայաստանյան այցը ոչ թե չեղարկվել է, այլ հետաձգվել է:
«Դեկտեմբերի 1-ին նախատեսված էր Վրաստանի վարչապետի այցը Հայաստան, սակայն վրացական կողմը հետաձգեց այցը՝ անորոշ ժամանակով, և այցը, իհարկե, կկայանա այն բանից հետո, երբ Վրաստանի խորհրդարանը կհաստատի կառավարության նոր կազմը», - փոխանցեց Մոսիձեն:
Վրաստանի վարչապետ Գիորգի Կվիրիկաշվիլիի հայաստանյան այցի հետ կապված հարցեր առաջացան այն բանից հետո, երբ Հայաստանի կառավարության լրատվական ծառայությունը երեկ երեկոյան կողմ՝ 17:00-ի սահմաններում հաղորդագրություն տարածեց, թե դեկտեմբերի 1-ին 11:45-ին Հայաստանի կառավարությունում տեղի կունենան երկու երկրների վարչապետերի՝ Կարեն Կարապետյանի ու Գիորգի Կվիրիկաշվիլիի հայտարարությունները լրատվամիջոցների ներկայացուցիչների համար: Այս հաղորդագրությունից մոտ մեկ ժամ անց ստացվեց նորը, ըստ որի «վրացական կողմի խնդրանքով Վրաստանի վարչապետ Գիորգի Կվիրիկաշվիլիի այցը Հայաստան հետաձգվել է անորոշ ժամանակով: Այն կկայանա Վրաստանի խորհրդարանի կողմից երկրի կառավարության կազմը հաստատելուց հետո»:
Սոֆո Մոսիձեին այսօր հարցրեցինք՝ արդյո՞ք Վրաստանի վարչապետի գրասենյակում նախօրոք տեղյակ չէին, որ կառավարության նոր կազմը դեռ հաստատված չէ, ուստի Կվիրիկաշվիլին չի կարող դեկտեմբերի 1-ին այցելել Երևան: Բացի այդ Վրաստանի վարչապետի այցը Հայաստան անորոշ ժամկետով հետաձգվեց այն բանից հետո, երբ Հայաստանի կառավարությունը հաղորդագրություն տարածեց այդ այցի մասին՝ անգամ նշելով լրագրողների հետ Կարապետյանի ու Կվիրիկաշվիլիի հանդիպման կոնկրետ ժամը: Ստացվում է Վրաստանի վարչապետի այցը հետաձգվել է վերջին պահին՝ Կվիրիկաշվիլիի Երևան ժամանելուց ընդամենը ժամեր առաջ, ինչը միջազգային հարաբերություններում խիստ հազվադեպ է պատահում:
Մոսիձեի արձագանքը․ - «Պարզապես իրավունք չունեմ ավելին ասելու: Ինձ մոտ առկա տեղեկությունը հետևյալն է՝ Վրաստանի վարչապետի այցը Հայաստան կկայանա: Այն չի չեղարկվել, այլ հետաձգվել է անորոշ ժամանակով, այսինքն, երբ Վրաստանի խորհրդարանը կհաստատի կառավարության նոր կազմը: Այս պահին չեմ կարող հստակ ամսաթիվ նշել, թե երբ կկայանա վարչապետի այցը Երևան»:
Մոսիձեին հիշեցրեցինք հայ-վրացական հարաբերություններում վերջին շրջանում ի հայտ եկած խնդրահարույց դրվագները: Նախ, լրատվամիջոցները գրեցին, որ Թբիլիսին Վրաստանում Հայաստանի դեսպանի պաշտոնում հրաժարվել է ընդունել ծագումով ջավախքցի քաղաքագետ Սերգեյ Մինասյանի թեկնածությունը:
Այնուհետև՝ օգոստոսի վերջին, Վրաստանի պաշտպանության նախարարությունը հայտարարեց, որ Հայաստանը վերջին պահին հրաժարվել է մասնակցել սեպտեմբերին մեկնարկող Agile Spirit-2017 զորավարժությանը:
Երկու օր առաջ հայտնի դարձավ, որ Սևծովյան տնտեսական համագործակցության խորհրդարանական վեհաժողովում բոլոր երկրների պատվիրակությունները՝ բացառությամբ Հայաստանի պատվիրակության, մասնակցել են մի քննարկման, որի արդյունքում վեհաժողովի հռչակագրում տեղ է գտել Երևանի համար անընդունելի և հակամարտություններին վերաբերող ձևակերպում: Այդ պատվիրակությունների թվում է եղել նաև վրացականը:
Վրաստանի կառավարության լրատվական ծառայության ղեկավարին հարցրեցինք՝ արդյո՞ք այս ամենը և վարչապետ Կվիրիկաշվիլիի հայաստանյան այցի անակնկալ հետաձգումը վկայում են, որ հայ-վրացական հարաբերություններում խնդիրներ են ի հայտ եկել:
«Իրավունք չունեմ խոսել այլ թեմաներից: Այս պահին միայն տեղեկություն եմ հայտնում», - արձագանքեց Սոֆո Մոսիձեն: