ՌԴ-ում Մոլդովայի դեսպանը կանչվել է արտգործնախարարություն
Ռուսաստանի արտաքին գորրծերի նախարարությունը Մոսկվայում Մոլդովայի դեսպան Անդրեյ Նեգուցին հանդիպման է հրավիրել: Պատճառը Մերձդնեստրի տարածքից ռուսական զորքը դուրս բերելուն միտված՝ Քիշնևի նախաձեռնությունն է:
Ռուսական դիվանագիտական գերատեսչության կայքէջում տեղադրված հաղորդագրության համաձայն՝ զորքի դուրսբերումը բացասաբար կանդրադառնա ռուս-մոլդովական համագործակցության և Մերձդնեստրում իրավիճակի կարգավորման վրա:
Ավելի Վաղ Մոլդովան պահանջել էր Մերձդնեստրից ռուսաստանյան զինստորաբաժանումների դուրսբերման հարցը ներառել ՄԱԿ-ի Գլխավոր Ասամբլեայի օրակարգում: Մոլդովացի դիվանագետները պնդում են, որ ռուսական զորքի ներկայությունը սպառնալիք է տարածաշրջանում խաղաղության և անվտանգության համար: Ռուսաստանը մերժել է Մոլդովայի պահանջը: Հունիսին Մոլդովայի խորհրդարանը հայտարարություն էր ընդունել ռուսական զորքի դուրսբերման մասին: Ռուսամետ նախագահ Իգոր Դոդոնը պատգամավորների հայտարարությունը սադրանք էր որակել:
Մերձդնեստրը, որտեղ գերիշխում է ռուսալեզու բնակչությունը, Մոլդովայից միակողմանիորեն անջատվել և անկախություն էր հռչակել 1990 թվականին: Միջազգային հանրությունն, այդուհանդերձ, այդ տարածքը համարում է Մոլդովայի մաս: Ռուսաստանը Մերձդնեստրում իր ռազմական ներկայությունը բացատրում է «խաղաղություն հաստատելու անհրաժեշտությամբ»: