Հյուսիսային Կորեան նոր հրթիռներ է արձակել
![Հյուսիսային Կորեան նոր հրթիռներ է արձակել](https://gdb.rferl.org/471603BA-46CF-41B5-A7F6-05011FE0B01C_w800_h450.jpg)
Հաղորդվում է, որ հրթիռներն արձակվել են Ճապոնական ծովի ուղղությամբ: ԱՄՆ խաղաղօվկիանոսյան հրամանատարությունը հայտարարել է, որ արձանագրել են փոքր հեռահարության երեք բալիստիկ հրթիռների արձակում: Ընդ որում՝ դրանցից մեկը պայթել է արձակումից անմիջապես հետո, իսկ մյուս երկուսը «ձախողվել են» թռիչքի ընթացքում:
Ամերիկացի զինվորականների խոսքով՝ հրթիռներն ուղղված չեն եղել ամերիկյան Գուամ կղզու վրա: Փհենյանը, հիշեցնենք, վերջերս սպառնացել էր հարվածներ հասցնել ամերիկյան այդ կղզուն: Ճապոնիայում էլ հայտարարել են, որ նախօրեին արձակված հրթիռները չէին սպառնում երկրի անվտանգությանը: Հյուսիսային Կորեան այս կապակցությամբ առայժմ որևէ հայտարարությամբ հանդես չի եկել:
Այս հրթիռների արձակումները տեղի են ունենում Հարավային Կորեայի եւ Միացյալ Նահանգների զինված ուժերի համատեղ զորավարժությունների ֆոնին, որոնք անցկացվում են Կորեական թերակղզում: Փհենյանն այդ զորավարժությունները համարում է Հյուսիսային Կորեայի վրա «հարձակման փորձ»: Ավելի վաղ Փհենյանի կողմից հրթիռների արձակումները ՄԱԿ-ի Անվտանգության խորհրդին հարկադրել են ավելի խստացնել տնտեսական պատժամիջոցները Հյուսիսային Կորեայի նկատմամբ: