«Ոսկե ծիրանի» առաջին օրը հագեցած է ուշագրավ միջոցառումներով
Երեկ ծիրանի օրհնությամբ ու Համո Բեկնազարյանի «Խասփուշ» ֆիլմի ցուցադրությամբ բացվեց 14-րդ «Ոսկե ծիրան» միջազգային կինոփառատոնը: 90 տարի առաջ նկարահանված համր ֆիլմի ցուցադրությունն ուղեկցվեց Վահագն Հայրապետյանի և նրա նվագախմբի՝ հատուկ այս ֆիլմի համար գրված երաժշտությամբ:
Փառատոնի շրջանակներում ցուցադրվելու է 47 ֆիլմ: 14-րդ «Ոսկե ծիրանը» փակման համար կազմակերպիչներն ընտրել են Ջո Բեռլինգերի «Ոչնչացման մտադրությամբ» վավերագրական ֆիլմը, որը պատմում է Հայոց ցեղասպանության մասին: Հանրահայտ ռեժիսորն այս ֆիլմը նկարահանել է պատմաբանների, գիտնականների հետ հանդիպումների արդյունքում՝ Թուրքիայի մերժողական քաղաքականության վրա լույս սփռելու նպատակով:
Առաջիկա շաբաթվա ընթացքում, բացի երեք մրցութային ծրագրերից՝ ավանդական դարձած «Երևանյան պրեմիերաներ», «Հետահայաց ցուցադրություններ» և «Հարգանքի տուրք», արտամրցութային ծրագրերը ևս այս տարի մեր կինոերկրպագուներին կծանոթացնեն համաշխարհային կինոյի գլուխգործոցներին:
Մրցութային ծրագրերում ներկայացված են ամենահեղինակավոր կինոփառատոներում մրցանակների արժանացած ֆիլմեր: Միջազգային խաղարկային ֆիլմերի ժյուրիի նախագահը շոտլանդական ծագումով հանրահայտ պրոդյուսեր, սցենարիստ Հյու Հադսընն է, ում «Հրե անվանակարգեր» ֆիլմը արժանացել է «Օսկարի» «Լավագույն կինոնկար» անվանակարգում:
«Այս տարվա ժյուրիները բավականին հետաքրքրիր մարդիկ են․․․ Պարոն Ստամբոլցյանը միշտ պատմում է, թե ինչ է նշանակում լավ փառատոն: Լավ փառատոնը դա լավ ժյուրին ա անպայման, ժյուրի, որի գնահատականը դու կարողանաս հարգես, ընդունես ու հպարտանաս դրանով: Դա լավ ֆիլմերն են և լավ քաղաքը և լավ մթնոլորտը, որտեղ ընդունում են այդ հյուրերին: Մենք երեքն էլ ունենք․ էս քաղաքում շատ լավ են իրենց զգում մեր հյուրերը», - ասաց փառատոնի հիմնադիր նախագահ Հարություն Խաչատրյանը:
Հյու Հադսընը Հայաստան է ժամանել Բրիտանական խորհրդի աջակցությամբ: Այս տարի ընդլայնվում է Բրիտանական խորհրդի համագործակցությունը «Ոսկե ծիրանի» հետ․ կինոփառատոնի շրջանակներում Բրիտանական խորհուրդը անցկացնում է բրիտանական ֆիլմերի շաբաթ: Նաև փառատոնի օրերին խորհրդի աջակցությամբ Երևան կժամանի անվանի սցենարիստ, թատերագիր Մերիլին Միլգրեմը, ով եռօրյա վարպետության դասընթաց կանցնացնի ոլորտի մասնագետների համար:
«Ոսկե ծիրանի» առաջին օրը բացվեց «Հայաստան - Թուրքիա» պլատֆորմը: Այսօր նաև վարպետության դասեր անցկացրեց Բորիս Խլեբնիկովը: Իսկ երեկոյան «Մոսկվա» կինոթատրոնում կցուցադրվի լեհ աշխարհահռչակ կինոռեժիսոր Անջեյ Վայդայի «Հետպատկերներ» ֆիլմը, որն արդեն արժանացել է բազմաթիվ հեղինակավոր կինոմրցանակների:
Իսկ ուշ երեկոյան «Երևանյան գիշերներ» խորագրի ներքո Սիրահարների այգում կցուցադրվեն Ջիմ Ջարմուշի «Ջիմ դեյնջեր» և Վարդան Հովհաննիսյանի «Թոմ Քաթինա» ֆիլմերը:
Փառատոնի առաջին օրվա արդյունքները ավանդաբար կամփոփվեն The Club ակումբում:
«Ոսկե ծիրանի» օրերին մայրաքաղաքի հատկապես կենտրոնական թաղամասերում հետաքրքիր աշխուժություն է տիրում:
Երևանի փոխքաղաքապետ Արամ Սուքիասյան․ - «Այս ամիսներին բազմաթիվ փառատոններ են Երևան քաղաքում տեղի ունենում՝ երաժշտական, թատերական, ինչպես նաև այս նշանավոր կինոփառատոնը, որը 14-րդ անգամն է՝ շատ սիրված, գնահատված, արժեվորված և կարևորված ինչպես զբոսաշրջիկների, այնպես էլ մեր երևանցիների, կինոսեր հասարակության կողմից»:
«Ոսկե ծիրան» կինոփառատոնի հետ մեր համագործակցության արդյունքում մենք ունենք մի շարք նախաձեռնություններ, որոնք վստահ եմ, որ շատ հաճո է լինելու մեր հանդիսատեսին, հասարակությանը, բնակչությանը և հյուրերին: Այս տարի ընդլայնվել է աշխարհագրությունը բացօթյա կինոցուցադրությունների: Բացի Կարապի լճից ու Շառլ Ազնավուրի հրապարակից, այս տարի կունենանք նաև Կասկադ համալիրում, Նոր Նորք վարչական շրջանում՝ Գայի արձանի հարևանությամբ, Հարավ-արևմտյան թաղամասում՝ «Հայաստան» կինոթատրոնի հարևանությամբ, Սիրահարների այգում, իհարկե նաև Ազատության հրապարակում», - հավելեց փոխքաղաքապետը: