Чет өлкөлүктөрдүн сабалышы: Кыргызстан канчалык коопсуз?
18-майга караган түнү Бишкекте Кыргызстандын жарандары чет өлкөлүк студенттердин жатаканасына кирип барып, ал жерде жашагандарды ур-токмокка алган. Бул окуяда дарыгерлерге жалпысынан 41 адам кайрылса, 11и дарылануусун улантууда, алардын абалы туруктуу экени кабарланды. Пакистандын элчилиги 14 жараны жабыркаганын ырастады. Бул окуя эмне себептен келип чыкты, укук коргоо органдары кандай иштешти, мындан аркы Кыргызстандын эл аралык коомчулук алдындагы кадыр-баркы кандай болот? "Азаттыктын" студиясында: Билим берүү жана илим министринин орун басары Расул Абазбек уулу, Эмгек, социалдык камсыздоо жана миграция министрлигинин чет өлкөлүк жарандар менен иштөө бөлүмүнүн башчысы Арлен Алиясов, Пакистандык студенттердин Кыргызстандагы биримдигинин өкүлү Мухаммад Умар Шакил жана эксперт Эржан Кайыпов.