Gazagystan koronawirusdan ölen ikinji adamy resmi derejede hasaba aldy
Gazak paýtagty Nur-Sultanyň Saglyk departamentiniň başlygy Saule Kisykowanyň habarçylara aýtmagyna görä, koronawirus bilen kesellän we mundan 10 gün ozal keselhana ýerleşdirilen 50 ýaşly adam 31-nji martda aradan çykdy.
Mundan öň, 26-njy martda Nur-Soltanyň töweregindäki Akmola sebitinde koronawirus bilen kesellän 65 ýaşly bir aýal aradan çykypdy.
Gazagystanyň saglyk resmileriniň maglumatyna görä, 31-nji martda ýurtda koronawirus ýokuşan adamlaryň jemi sany 325-ä ýetdi.
Goňşy Gyrgyzystanyň Bişkek şäherinde adamlaryň garyndaşlaryna we dostlaryna barmagy, şeýle-de maşgala agzalaryny hasaba almazdan, üçden köp adamyň bir ýerde jemlenmegi gadagan edildi.
Şeýle-de, gyrgyz paýtagtynda ulaglaryň “gereksiz” ulanylmagy gadagan edilen mahaly, şahsy ulag sürüjilerinden, iş berijileri tarapyndan berlen ýörite kagyz arkaly, özleriniň işe barýandygyny ýa-da işden gelýändigini subut etmek talap edilýär.
31-nji martda goňşy Özbegistanda koronawirus bilen kesellänleriň umumy sanynyň 158 adama ýetendigi, şol sanda iki adamyň ölendigi resmi derejede tassyklandy.
Merkezi Aziýanyň beýleki iki ýurdunda – Türkmenistanda we Täjigistanda – häzire çenli koronawirus bilen kesellän adamlaryň ýokdugy aýdylýar. Bu iki ýurt hem berk gözegçilikde saklanýar.