«Հայփոստ»-ը Եվրոպայի հետ փոստի եւ բեռների կանոնավոր փոխադրումներ կիրականացնի
Հայաստանի փոստային կապի ազգային օպերատոր «Հայփոստ» ընկերությունը հոկտեմբերի 1-ից փոստի եւ բեռների կանոնավոր չվացուցակով պարբերական փոխադրումներ կիրականացնի Հայաստանից դեպի Եվրոպա եւ հակառակ ուղղությունով:
Երեւանի Հանրապետության Հրապարակում այսօր ներկայացվել են նոր ծրագիրն ու դրա իրագործման համար ներկրված մեքենաները, որին ներկա է եղել նաև ՀՀ տրանսպորտի և կապի նախարար Վահան Մարտիրոսյանը:
«Նոր ծառայությունը Երեւանից Ֆրանկֆուրտի բեռնային հանգույց եւ հակառակ ուղղությամբ փոստի ու բեռների շաբաթական փոխադրումների միջոցով կամրապնդի Հայաստանի կապը եվրոպական երկրների հետ: Միաժամանակ, այն կտրուկ առաջընթաց կապահովի Հայաստանում առցանց առեւտրի համար»,- ասված է հաղորդագրությունում:
«Հայփոստ»-ում տեղեկացրել են, որ նոր ծառայության մատուցման նպատակով ձեռք է բերվել Mercedes-Benz Actros 2530 GigaSpace մոդելի 2 լիովին նոր բեռնատար ավտոմեքենա՝ 6×4 անվակազմով: Մեքենաների հզորությունը 530 ձիաուժ է, յուրաքանչյուրի բեռնատարողությունը՝ 27 տոննա: Հավելյալ բաքերի շնորհիվ մեկ լիցքավորմամբ մեքենաները կարող են հաղթահարել մինչեւ 4500 կմ ճանապարհ:
«Մեքենաները հագեցած են առաջատար արտադրողների գերժամանակակից սարքավորումներով եւ երկար տարածություններ անցնելիս առավելագույն հարմարավետ պայմաններ են ապահովում վարորդների համար: Իրենց ճկուն կոնֆիգուրացիայի շնորհիվ սառեցման հնարավորությամբ օժտված նոր բեռնատարները կարող են փոխադրել ինչպես ընդհանուր, այնպես էլ շուտ փչացող ապրանքներ»,- ասված է հաղորդագրությունում:
Միաժամանակ, «Հայփոստ»-ի շարժակազմը համալրվել է 12 նոր Renault Dokker ֆուրգոններով` նախատեսված Հայաստանի միջմարզային փոխադրումների համար:
14 մեքենաներին ուղղված ամբողջական ներդրումը կազմել է շուրջ $1 մլն: