Բագրատյանը դրոշակը ձեռքին նստել է «արդարության ավանակի» վրա և եկեղեցու հարցերն է ցանկանում լուծել. Կոմիտաս Վարդապետ Հովնանյան
Կոմիտաս վարդապետ Հովնանյանը Tert.am-ի հետ զրույցում անդրադարձավ «Հայ ազգային կոնգրես» խմբակցության անդամ Հրանտ Բագրատյանի այն առաջարկին, որ պետք է եկեղեցին էլ հարկվի:
«Դա պարզապես Հրանտ Բագրատյանի կարծիքն է, չգիտես ինչու նա նստել է իր «արդարության ավանակի» վրա՝ դրոշակը ձեռքին և ինչ-որ եկեղեցու հարցեր է ցանկանում տարիներ շարունակ լուծել»,-ասաց նա և նշեց, որ Հրանտ Բագրատյանին պետք է հարցնել, թե որն է իր նպատակը:
«Եթե ինքը մտածում է, որ եկեղեցուց գանձված հարկերը պետք է փրկեն այս երկիրը, կարծում եմ՝ մի քիչ սխալվում է: Թող ինքը մտածեր իր վարչապետության ժամանակ երկիրը ձևավորեր այնպես, որ եկեղեցու հարկման կամ չհարկման խնդիրը իր համար չդառնար կյանքի փրկություն»,-ասաց նա։
Կոմիտաս Վարդապետ Հովնանյանը նշեց, որ եկեղեցին առանձնապես մուտքեր չունի, որ հարկման խնդիրը դառնա լինել կամ չլինելու խնդիրը ՀՀ-ի:
«Եկեղեցին ահռելի բարեգործություններ է կատարում, այդ բարեգործությունների դիմաց արդյոք պետությունը որևէ բանով փոխհատուցո՞ւմ է եկեղեցին: Ես օրինակ պատասխանատուն եմ հայորդաց տների, հինգ հազարի շուրջ երեխա մեզ մոտ դաստիարակվում է, հազարից ավելի անօթևան սնունդ են ստանում։ Ինչո՞ւ Բագրատյանի աչքին այս ամենը չի երևում, հանկարծ ինչ-որ 60 դրամ վաճառվող մոմի հարկն է երևում: Եթե այդքան մեծ էկոնոմիստ է, թող ինքը խոսի այն անձանց հարկվելու մասին, ովքեր ահռելի միլիարդներ ունեն կուտակած և ոչ մի հարկ չեն վճարում, դրանից հետո թող մտածի եկեղեցու մասին»,-ասաց նա:
Նա նշեց, որ ոչ թե սխալ է համարում եկեղեցին հարկելը, այլ գտնում է, որ հարկման շատ ավելի կարևոր տեղեր և անձինք կան, որտեղից պետք է սկսել, և վերջում հերթը հասցնեն եկեղեցուն:
«Ես կցանկանայի, որ Բագրատյանն այնքան անկեղծ լիներ, որ իր չվճարած հարկերը մուծեր, որից հետո խոսեր եկեղեցու հարկման, կամ չհարկման մասին»,-ասաց նա: