საკონსტიტუციო სასამართლოს ახალი მოსამართლეები - არასამთავრობოები გამოწვევებზე საუბრობენ
საკონსტიტუციო სასამართლოში ახალი მოსამართლეების დანიშვნის ფაქტს ეხმაურებიან არასამთავრობო ორგანიზაციები. სამოქალაქო სექტორს მათ მიმართ კონკრეტული რეკომენდაციებიც აქვთ. არასამთავრობო ორგანიზაცია საერთაშორისო გამჭვირვალობა - საქართველოს აღმასრულებელი დირექტორი ეკა გიგაური რამდენიმე საკითხზე ამახვილებს ყურადღებას.
გიგაური ამბობს, რომ ახალი მოსამართლეების მთავარი გამოწვევაა ეფექტურად განაგრძოს სასამართლომ ფუნქციონირება და იყოს დამოუკიდებელი.
„მთავარი გამოწვევა, რომელის წინაშეც დადგებიან მოსამართლეები, იქნება ის, რომ ის დაძაბული სიტუაცია, რომელიც არის ახლა საკონსტიტუციო სასამართლოში განიმუხტოს და რაც შეიძლება ეფექტურად განაგრძოს სასამართლომ ფუნქციონირება. მეორე მნიშვნელოვანი გამოწვევა არის ალბათ არაპირდაპირი და პირდაპირი ზეწოლა, რომელიც შეიძლება მიმდინარეობდეს ყველა მხრიდან და ძალიან მნიშვნელოვანია, რომ ამ ადამიანებმა ასევე ანახონ მაგალითი სხვა მოსამართლეებსაც, რომ დამოუკიდებელი იყოს საკონსტიტუციო სასამართლო და ყველანაირ ზეწოლას გაუძლოს და მესამე მნიშვნელოვანი გამოწვევა არის ის, რომ ზოგადად სასამართლომ უნდა იმოქმედოს საზოგადების ინტერესებიდან გამომდინარე,“-განაცხადა ეკა გიგაურმა.
არასამთავრობო ორგანიზაციის კონსტიტუციის 42-ე მუხლის აღმასრულებელი დირექტორი ამბობს, რომ ის მოვლენები, რაც სასამართლოს ირგვლივ განვითარდა რეალურად მთლიანად პროცესს და ინსტიტუციას უქმნიდა საფრთხეს.
„საკონსტიტუციო სასამართლო ბოლო პერიოდში პრაქტიკულად კრიზისში იყო. ის მოვლენები, რაც სასამართლოს ირგვლივ განვითარდა რეალურად მთლიანად პროცესს და ინსტიტუციას უქმნიდა საფრთხეს. ამიტომ ძალიან მნიშვნელოვანია პირველი ოქტომბრიდან იმ მოსამართლეების აქტიური ჩართვა და მუშაობა ამ კრიზისიდან გამოსვლისთვის.
"ასევე ძალიან მნიშვნელოვანია ის გადაწყვეტილებები, რომელიც ამდენი ხანია ელოდებიან დღის შუქს იქნას დროულად მიღებული. ვინაიდან რიგ შემთხვევებში ამ საქმეების უკან დგანან კონკრეტული ადამიანები, რომლებსაც თავისუფლება აქვთ აღკვეთილი. კონკრეტული საქმეები და ის შედეგები, რაც ძალიან მნიშვნელოვანია ადამიანის უფლებათა დაცვისათვის და საკონსტიტუციო სასამართლოს მნიშვნელობის გაჯანსაღებისთვის,“-განაცხადა ნინო ელბაქიძემ.
შეგახსენებთ, რომ ახალი მოსამართლეები მუშაობას მას შემდეგ შეუდგებიან, რაც დადებენ ფიცს და დაკომპლექტდება კოლეგიები, ასევე მოხდება თავმჯდომარის არჩევა. ფიცის დადების ცერემონია კვირას გაიმართება.