Танзила Норбоева Сенат раиси бўлди

Хотин-қизлар қўмитасининг собиқ раиси Танзила Камаловна Норбоева Сенатнинг янги раиси сифатида тасдиқланди. Бу ҳақда Сенатнинг ялпи мажлиси вақтида маълум қилинди. Kun.uz нашри хабар беришича, президент фармони билан Олий Мажлис Сенати аъзоси этиб тайинланган Танзила Норбоева йиғилиш давомида президент томонидан Сенат раиси лавозимига тавсия қилинган, сенаторлар уни раҳбарликка тасдиқлашган. У бу лавозимда 20 июнь куни Бош прокурорликка ўтган Ниғматулла Йўлдошев ўрнини эгаллади. Танзила Норбоева муқаддам Вазирлар Маҳкамасида ишлаган, 2010-2016 йилларда Ўзбекистон Касаба-уюшмалари федерациясига раислик қилган. У 2016 йилнинг декабридан буён Ўзбекистон бош вазири ўринбосари - Хотин-қизлар қўмитаси раиси сифатида ишлаб келаётганди. Шу тариқа, Ўзбекистон тарихида илк марта Сенатга аёл киши раис бўлди.