Күңелләрдә якты балкыш яши әле...

Беренче һәм икенче сайлап алу турларында районыбыз сәхнәләрендә 1013 ветеран катнашты. Ул концертларга әзерләнүләр, сәхнәдә чыгыш ясаулар авылларга үзенә бертөрле җанлылык өстәде, өлкәннәребез тормышына ямь кертте. Зона фестиваленә иң-иңнәре сайлап алынган иде. Алдан ук әйтеп куясы килә: сәхнәдә дистәләгән үзешчәннәр (безнең районнан гына да 65 кеше чыгыш ясады) чыгыш ясаса да, искиткеч тәртип, оешканлык хөкем сөрде. Фестиваль концертын оештыручыларның осталыгы, әлеге чарага җитди карауларыннан килгәндер бу.

 

Безнең районнан зона бәйгесенә унбер номер сайлап алынган иде. Дөресен әйтергә кирәк, мин үзем һәр номерны сөенеп, горурланып карадым. Газетада күп еллар мәдәният темасын алып бардым. Яңа Бүләк авылыннан Рәшидә апа җырлагандай, мин бүген сәхнәдә чыгыш ясаучы ветеран үзешчәннәребезнең «алма кебек яшь чакларын» да беләм. Талант бар икән, ул елларга баш бирми, тоныкланмый. Иске Дөреш авылыннан Гыйздулла Вәлиуллинның Мостафа Ногман сүзләренә Рөстәм Яхин язган «Каеннар шаулый» җырын зал тын да алмый тыңлады. Кнәз мәдәният йортына яшьләр генә түгел, ветераннар да яратып йөри. Кем әйтмешли, анда «үз кешеләр» алар. Сергей Захматов җитәкчелегендәге хор Виктор Величкин сүзләренә Анатолий Воронин язган «Ветераннар гимны»н алып килгән иде. Әлеге коллектив үзешчәннәре урып-җыю вакытында, агитбригада оештырып, кыр станнарыннан кайтып кермәде. Элекке еллардан сакланып калган матур традиция бу. Табыннарыбызны ипекәйле итүчеләргә ихлас рәхмәт билгесе. Бүген дә оста башкарулары, матур җырлары белән сөендерделәр.

 

Ветераннарның «Балкыш» фестиваленең тансык үзешчәне Рәшидә апа Мирсәетованы сәхнәдә күргән саен шатланам мин. Аны күп еллардан беләм, спектакльләрдә уйнаган, көр тавыш белән җырлаган чаклары исемдә. Быел район сайлап алу туры сәхнәсендә күргәч, хәйраннар калдым: һаман җырлый, һаман шук күңелле икән. Сугыш елларында үсмер кыз – тракторда, аннары гомере буе терлекчелектә эшләгән, «Почет билгесе», Хезмәт Кызыл Байрагы орденнары кавалеры 87 яшьлек Рәшидә апа сәхнәдә шук елмаеп, көр тавыш белән «Алма кебек матур чагым, сиңа кем кирәк тагын...» дип җырлаганда зал аны яратып, елмаеп тыңлады, аннары алкышларга күмде. Кече Шилнәдән Татьяна Иванова гомере буе сәхнәдә – нәфис сүз остасы ул, районда үтә торган бик күп чараларны алып барды. Шигырь сөйли башласа, зал шым була, чөнки ул ышанычлы, тетрәндергеч тавышы белән һәр йөрәккә кагыла, сүзләренә инандыра белә.

 

Күзкәй авылының сәхнә ветераны, җырчы-баянчы Рафис Хәсәнов җитәкләгән «Әллүки» халык фольклор коллективы талантларга бай: гармунчылар ансамбле дә, курайчылары, җырчы-биючеләре дә бар. Бер авылдан зона фестиваленә өч номер сайлап алулары да шуны раслый. Бу юлы шәһәр сәхнәсенә Рафис Хәсәнов белән Ярулла Насыйфуллинның курай белән баян дуэтын, сигез кешелек лирик бию, нәфис сүз алып килгәннәр иде. Иске Абдул ветераннары зона бәйгесенә Мирзаһит Нәҗмиевны җибәргәннәр. Ул татар халык көйләренә попурри башкарды, Сәмәкәй авылыннан Зөһрә Ризванова Ангам Атнабаевның «Бу кешегә ни җитми» шигыре белән уйландырды да, шомландырды да. Бәткенең «Ладушки» халык фольклор ансамбле составы шактый яңарган, бик матур сәхнә киемнәре дә тектергәннәр. Алар алып килгән «Вдовы России» җырын зал тын да алмый тыңлады, аның сүзләре дә фестиваль тематикасына тәңгәл иде. 

 

Безнең район ветераннарының концерты Арби Велидов җитәкчелегендәге, районда гына түгел, республикада танылган «Сударушка» халык фольклор ансамбле чыгышы белән тәмамланды. Үзешчән коллектив рус халык җырларын профессиональ югарылыкта башкарды. 

 

Ахырдан жюри рәисе ТРның халык артисты Ш. Әхмәтҗанов һәм Татарстанның атказанган мәдәният хезмәткәре Г. Рзаева фестивальнең зона турында катнашкан үзешчән ветераннарга Дипломнар тапшырды.

 

Районыбыздан ике номер – Рәшидә Мирсәетованың җыры һәм «Сударушка» халык фольклор ансамбле чыгышы «Балкыш» фестиваленең Гала-концертына сайлап алынды.