ЎзПФЛ ҳакамлик ва ВАРга жиддий эътироз билдирди
Ўзбекистон Профессионал футбол лигаси мамлакат футбол майдонларида ҳакамлик ва ВАР тизими билан боғлиқ ҳолатлар юзасидан жиддий муносабат билдирди. Лига расман ЎзФҲМга мурожаат қилиб, айрим ҳакам қарорлари қайта кўриб чиқилишини талаб қилган.
Шу билан бирга, ЎзПФЛ томонидан бош ҳакам Рустам Лутфулинни Суперлига, Про-лига ҳамда Ўзбекистон Кубоги каби барча мусобақалардан вақтинчалик четлатиш таклифи илгари сурилгани маълум қилинди.
Лига раҳбарияти фикрича, “Қўқон-1912” ва “Насаф” ўртасидаги учрашувнинг 78-дақиқасида юзага келган вазият катта баҳсларга сабаб бўлган. Дастлаб бош ҳакам Рустам Лутфулин ҳолатни тўғри баҳолаб, ўйинни давом эттиришга қарор қилган. Бироқ кейинчалик ВАР ҳаками Иброҳим Исмоилов аралашиб, вазиятни қайта кўриб чиқишни таклиф этган ва шундан сўнг майдондаги қарор ўзгарган.
ЎзПФЛ таъкидлашича, ўша куннинг ўзида Эксперт ҳакамлар гуруҳи тезкор таҳлил ўтказиб, ВАР томонидан берилган чақирув нотўғри бўлганини ҳамда аслида бош ҳакамнинг қарорида ҳам хато борлигини қайд этган.
Шу билан бирга, ўтган мавсум Суперлиганинг 15-турида бўлиб ўтган “Динамо” — “Насаф” учрашуви ҳам эслатиб ўтилган. Унда Рустам Лутфулин “Насаф” дарвозасига шубҳали пеналти белгилагани танқидларга сабаб бўлган. Аммо ўша учрашув техник носозлик туфайли эфирга узатилмаган ва ВАР тизими ҳам ишламагани учун Лига ҳакамни жавобгарликка тортмаган.
ЎзПФЛ баёнотида шундай савол ҳам кўтарилган: агар турли ракурсларда такрорий кўринишлар мавжуд бўлган ҳолда ҳам ҳакамлар хатога йўл қўяётган бўлса, унда ВАР тизимининг амалдаги вазифаси нимадан иборат?
Ҳозирча мазкур вазият бўйича расмий якуний қарор эълон қилинмаган, бироқ футбол жамоатчилиги орасида муҳокамалар кучайиб бормоқда.