Доннарумма даъволарни рад этди: ЖЧ-2026 учун пул талаб қилинмаган
“Манчестер Сити” клуби ва Италия терма жамоаси дарвозабони Жанлуижи Доннаруммага нисбатан тарқалган хабарлар, жумладан футболчилар Жаҳон чемпионатига йўлланма олиш учун пул талаб қилганлиги ҳақидаги маълумотлар рад этилди. Бу ҳақда Sky Sport нашри хабар бермоқда.
Дарвозабоннинг сўзларига кўра, жамоа ичида бундай масала умуман кўтарилмаган ва бу гап-сўзлар уни энг кўп ранжитган. Доннарумма ўзининг сардор сифатида федерациядан бир евро ҳам талаб қилмаганлигини таъкидлади.
«Одатда, жамоа мақсадга эришса, федерация футболчиларга совға беради — холос. Ҳеч ким махсус бонус сўрамаган. Биз учун энг катта мукофот Жаҳон чемпионатига йўлланма олиш бўлар эди, аммо афсуски, бу амалга ошмади», — деди у интервьюда.
Эслатиб ўтамиз, аввалроқ тарқалган хабарларда Италия терма жамоаси футболчилари ЖЧ-2026 йўлланмаси учун 300 минг евро бонус талаб қилгани айтилиб, бу муҳокамаларга сабаб бўлган эди. Аммо Доннарумма бу хабарларни тўлиқ рад этди ва ҳақиқатни очиқ-ойдин баён қилди.